Çmimet e naftës u tregtuan më të larta të premten dhe ishin në rrugën e duhur për ta mbyllur javën me një rritje të lehtë mes shpresave për një rikuperim të shpejtë të kërkesës për karburant në Kinë dhe rritje ekonomike më të fortë se sa pritej në Shtetet e Bashkuara të Amerikës.
Brent, pikë referimi për dy të tretat e naftës në botë, ishte 0.37 për qind më i lartë në 87.79 dollarë për fuçi. Nafta amerikane e Teksasit Perëndimor u rrit me 0.36 për qind në 81.30 dollarë për fuçi.
Ekonomia amerikane u ngadalësua lehtë në tremujorin e fundit të 2022-shit, megjithëse ajo u rrit ende me një ritëm më të shpejtë se sa pritej, mes frikës se ekonomia më e madhe në botë po shkon drejt një recesioni këtë vit. Produkti i brendshëm bruto i vendit u rrit me një normë 2.9% nga tetori në dhjetor. Kjo shënon dy tremujorë radhazi të rritjes ekonomike, pas rritjes prej 3.2 % në tremujorin e mëparshëm. Rritja e përgjithshme për vitin 2022 ishte 2.1 %, sipas analizës, nga 5.9% në 2021.
Kontratat e së ardhmes së naftës janë rritur për dy javë rresht pasi Kina – ekonomia e dytë më e madhe në botë dhe importuesi kryesor i naftës së papërpunuar – rihapi kufijtë e saj për herë të parë në tre vjet, duke shkaktuar një rritje të mprehtë të rezervimeve të linjave ajrore.
Investitorët do të ndjekin nga afër një takim të delegatëve të OPEC javën e ardhshme, pasi një embargo e BE-së ndaj produkteve të papërpunuara ruse hyn në fuqi më 5 shkurt. Ndërsa Rusia ka qenë në gjendje të ridrejtojë naftën e papërpunuar në Kinë dhe Indi pas sanksioneve të dhjetorit, do të jetë “më sfiduese” për eksportuesin e energjisë që të devijojë produktet e rafinuara në tregje të tjera gjatë muajve të ardhshëm.
Sipas Agjencisë Ndërkombëtare të Energjisë, eksportet ruse të naftës ranë me 200 mijë fuçi në ditë në dhjetor, pas një embargoje të naftës së papërpunuar të BE-së dhe një kufiri të çmimit të G7-ës për dërgesat e papërpunuara. Në të njëjtën kohë, eksportet ruse të naftës u rritën në një nivel shumëvjeçar prej 1.2 milionë fuçi në ditë, nga të cilat 720 mijë fuçi në ditë ishin të destinuara për BE-në.
Kina, e cila po heq kufizimet në eksportet e naftës, mund të përmbushë 30% deri në 50% të deficitit të Europës. Ndërkohë, çmimet europiane të gazit natyror kanë rënë gjatë muajve të fundit për shkak të një dimri jashtëzakonisht të ngrohtë.
Dhe pse çmimet kanë zbritur nga nivelet më të larta të vitit të kaluar, gazi natyror është ende 220 deri në 230% mbi mesataret e para Covid-it, sipas një raporti të Institutit të Financave Ndërkombëtare (IIF)./Scan tv/
