Nga gjithë vitet e pasluftës, 2022 ishte viti më me bereqet sa i përket regjistrimit të bizneseve në Kosovë.
Gjatë 12 muajve u legalizuan 11 mijë e 24 kompani të reja. Gjatë vitit të kaluar janë evidentuan 375 biznese më shumë se më 2021.
Viti 2023 ka nisur mbarë për sa i përket regjistrimit të bizneseve të reja në Kosovë sipas Ministrisë së Industrisë dhe Tregtisë, përderisa viti i kaluar konsiderohet me numrin më të madh të regjistrimit të bizneseve që nga pavarësia.
Vetëm gjatë janarit të vitit 2022, në Kosovë janë regjistruar 313 biznese të reja, ndërsa janë mbyllur 38.
Ministria e Industrisë dhe Tregtisë ka treguar se në vitin 2022 janë regjistruar gjithsej 11 mijë e 51 biznese e janë mbyllur 1 mijë 775.
Një shifër të tillë e ka bërë publike edhe Agjencia e Statistikave të Kosovës.
“Gjatë 12 muajve u legalizuan 11 mijë e 24 kompani të reja. Më 2022 u evidentuan 375 biznese më shumë se më 2021, ku dominon tregtia me shumicë e pakicë, riparimi i mjeteve dhe makinerive motorike, ndërtimtaria. Pjesa dërrmuese e bizneseve janë regjistruar deri në 4 punëtorë, teksa nga komunat, dominon Prishtina pasuar nga Ferizaj e Prizreni”.
Kurse, gjatë katër mujorit të fundit të vitit 2022 janë regjistruar mbi 2 mijë e 600 ndërmarrje.
“Në TM4 2022, gjithsej janë regjistruar 2.636 ndërmarrje, ku krahasuar me tremujorin paraprak (TM3 2022) ka një rënie për 3.15% të ndërmarrjeve të regjistruara. Ndërsa, krahasuar me tremujorin e njëjtë të vitit paraprak (TM4 2021) ka një rritje për 9.10% të ndërmarrjeve të regjistruara”.
Por sipas një studimi të Aleancës Kosovare të Bizneseve, mbi trendin e sipërmarrjes për tri vitet e kaluara, vitin më të rëndë të pandemisë janë mbyllur më shumë se 20 mijë biznese.
Kryetari i AKB-së, Agim Shahini, tha se viti 2022 ishte më i mirë për sa i përket regjistrimit të bizneseve të reja në vend që nga paslufta. Por ai thotë se në listën e bizneseve figurojnë edhe ato biznese të cilat nuk janë aktive por që për shkak të procedurave nuk e kanë shuar ende biznesin.
“Ky vit është shumë më i mirë se viti 2020. Është vit ku më së shumti kemi pasur biznese të hapura që nga pavarësia e këndej. Por sipas analizave tona ka disa studime dhe hulumtime të bëra se numri i bizneseve të shuara është më i lartë se sa figuron. Ka më shumë se 3 mijë e 500 biznese të shuara në tërë Kosovën, nga sektorë të ndryshëm e që ata nuk kanë hyrë në procedura të shuarjes së biznesit në mënyrë zyrtare për shkak se proceduarat janë të stërzgjatu”.
E numri i bizneseve që janë mbyllur po konsiderohet së është i lartë. Njohësi i fushës së ekonomisë, Safet Gerxhaliu, në një deklarim për media ka thënë institucionet e vendit duhet marrë masa për të ndihmuar biznesin nga kriza, në mënyrë që të mos mbyllen.
“Vërtet kemi një situatë e cila meriton respekt por është edhe obligim që të shpëtohen biznese të cilat kanë sfida. Në vitin 2023 besoj të ketë më tepër dialog e fushata ndërgjegjësimi dhe nuk do të shikohet biznesi për t’u penalizuar por për t’u mbështetur dhe zhvilluar”, tha ai.
Administrata Tatimore e Kosovës ka bërë të ditur se 57 mijë e 480 është numri i bizneseve të cilët kanë paguar tatim për vitin 2022.
