Për shkak të Brexit-it, paundi – monedha britanike – ka rënë në nivelin më të ulët të tridhjetë viteve kundrejt dollarit. Euro ka rënë gjithashtu në një nivel të ulët kundrejt dollarit. Vlera e jenit japonez gjithashtu është rritur në vlerë në krahasim me paundin.
Por, çfarë do të thotë që një monedhë të jetë e fortë apo e dobët duke marrë në konsideratë se mund të ndikojë tek ju më shumë sesa mendoni?
Çfarë e bën një monedhë të fortë apo të dobët?
Një monedhë klasifikohet si e fortë kur vlen më shumë se monedha e një vendi tjetër – me fjalë të tjera, nëse dollari amerikan do të vlente gjysmë paund, paundi do të ishte dukshëm më i fortë se dollari. Kjo do të thotë se dollari amerikan do të ishte dukshëm më i dobët se paundi. Prado të ishte më e lehtë për dikë nga Anglia të përballonte pushime në Amerikë sesa do të ishte për dikë nga Amerika të përballonte pushime në Angli. Do të thotë gjithashtu se produktet nga Anglia do të kushtonin më shumë për një amerikan dhe produktet nga Amerika do të kushtonin më pak në Angli.
Disa vende kanë monedha shumë të forta kur ekonomia botërore është e dobët ose politikisht e paqëndrueshme. Këto vende quhen “strehë të sigurta” sepse shihen si ekonomikisht dhe politikisht të qëndrueshme. Me fjalë të tjera, monedha e tyre ka të ngjarë të rikuperohet nga çdo trazirë që ndodh. SHBA-ja shihet si një “strehë e sigurt”, kështu që dollari tenton të forcohet në kohë paqëndrueshmërie.
Kur monedha e vendit është shumë e fortë, mallrat e importuara janë më të lira dhe është më e lehtë për të bërë pushime në një vend të huaj. Në dispozicion ka më shumë të ardhura dhe ka më shumë gjasa që pushimet e ëndrrave të bëhen realitet. Por nuk është aq e thjeshtë.
Disa vende i mbajnë qëllimisht të dobëta monedhat e tyre. Një nga arsyet është se nëse është më e lirë për vendin tuaj të importojë mallra – sepse monedha e tij është më e fortë se një vend tjetër – kjo e bën më të shtrenjtë për vendin tjetër importimin e mallrave. Përveç kësaj, njerëzit mund të blejnë mallra të importuara në vend të mallrave të prodhuara në vend për të kursyer para. Kur monedha juaj është më e dobët, më shumë njerëz duan të blejnë mallrat e vendit tuaj, që do të thotë se do të ketë më shumë kërkesë, përkthyer në më shumë vende pune.
Një monedhë e fortë është e mirë për njerëzit që duan të udhëtojnë jashtë vendit dhe njerëzit që pëlqejnë produktet e importuara, sepse ato do të jenë më të lira. Megjithatë, mund të jetë e keqe për kompanitë vendase.
Dhe ndërsa bota po bëhet gjithnjë e më globale, gjithnjë e më shumë produkte importohen, kështu që kjo ndikon në të ardhurat e disponueshme të njerëzve. Idealja është që ruhet një ekuilibër.
