Policia e Kosovës njofton se ka zhvilluar veprime hetimore, disa mujore, në zbulimin e personave të dyshuar të cilët përmes rrjetit social “Tik Tok” kanë shpërndarë video ku shihet se ata bëjnë shitjen e parave të falsifikuara si kartëmonedha dhe monedha metalike.
“Gjatë hetimit profesional janë siguruar prova se personat e dyshuar me iniciale(F. V.) mashkull/kosovar, (S. A.) mashkull/kosovar, (A. V.) mashkull/kosovar, (B. R.) mashkull kosovar dhe (E. V.) mashkull/kosovar,janë marrë me veprimtari kriminale ku kanë mashtruar dhjetëra persona kinse do të ju shesin para të falsifikuara, derisa në anën tjetër personat që kanë tentuar të blejnë para të falsifikuara, kanë kryer vepër penale nga neni 296 paragrafi 4 i KPRK-së”, thuhet në njoftimin e PK-së .
Vlera e përfitimit që këta persona kanë përfituar me anë të mashtrimit, sipas këtij njoftimi, është rreth 20 mijë euro.
Bëhet e ditur se idhur me rastin me datën 29.08.2023 është zbatuar plani operativ përkatës ku hetuesit kompetent në orët e mëngjesit kanë realizuar Urdhëresën e Gjykatës Themelore në Gjilan, dega në Viti, për kontrollimin e shtëpive të pesë personave të dyshuar të lartcekur.
“Gjatë kontrollimit të shtëpive të personave të dyshuar janë sekuestruar:1 (një) granatë dore,1 (një) armë automatike,1 (një) karikator i armës, 52 (pesëdhjetë e dy) fishekë, dhe 1 (një) telefon mobil. Të dyshuarit janë dërguar në stacionin policor dhe janë intervistuar në prezencë të avokatëve të tyre mbrojtës dhe të njëjtit me aktvendim të prokurorit të lëndës dërgohen në mbajtje për 48 orë”, njofton PK.