Papunësia në Eurozonë ka rënë në nivelin më të ulët historik , si një shenjë se tregu i punës në rajon mbetet në gjendje të mirë pavarësisht rritjes së dobët ekonomike.
Eurostat, agjencia statistikore e BE-së, tha të martën se shkalla e papunësisë së bllokut të monedhës së vetme euro ishte 6.4 për qind.
Tregu i punës i rajonit ka rezultuar më elastik sesa pritej nga ekonomistët, të cilët kishin parashikuar një normë papunësie për qershorin prej 6.5 për qind në një sondazh të Reuters.
Numri i të papunëve në eurozonë ra në pak më shumë se 10.8 milionë në qershor, 62,000 më pak nga muaji i kaluar, tha Eurostat.
Ekonomistët vunë në dukje rënien e vendeve të lira të punës në Gjermani dhe Francë në korrik për të paralajmëruar se tregu i punës i bllokut mund të fillojë të dobësohet për shkak të një rënieje ekonomike të pritshme më vonë gjatë këtij viti, pasi rritja e fundit e normave të interesit nga Banka Qendrore Evropiane rëndon mbi aktivitetin.
Të dhënat zyrtare tregojnë gjithashtu se, ndërsa shkalla e papunësisë është e ulët, numri i orëve të punës nga punonjësi mesatar mbetet nën nivelet e para pandemisë. Rritja e produktivitetit është gjithashtu e dobët.
“Ne presim që shkalla e papunësisë në eurozonë të rritet në pjesën tjetër të këtij viti pasi shtrëngimi i politikës monetare shkakton dobësim në aktivitetin ekonomik,” tha Giulia Bellicoso, një ekonomiste e Capital Economics.
Ekonomia e eurozonës u rimëkëmb në tremujorin e dytë duke u rritur me 0.3 për qind nga tremujori i mëparshëm, pas gjashtë muajsh tkurrje të lehtë të prodhimit të brendshëm bruto.
Por sondazhet e fundit tregojnë për një rënie të mundshme të prodhimit të biznesit dhe huadhënies bankare në korrik, gjë që ekonomistët mendojnë se rrit rrezikun e një recesioni të eurozonës në gjysmën e dytë të vitit.
“Të dhënat e sondazhit sugjerojnë se kërkesa për fuqi punëtore po zvogëlohet, veçanërisht në prodhim, pasi kompanitë përballen me një rënie të kërkesës, por ato vazhdojnë të tregojnë punësim ende në rritje,” tha Melanie Debono, një ekonomiste në konsulentët Pantheon Macroeconomics.
Megjithatë, kishte pak shenja të një ndryshimi në tregun gjerman të punës në korrik, pasi të dhënat kombëtare të publikuara të martën treguan se numri i të papunëve në vend u ul me 4,000 në fillim të tremujorit të tretë.
Elasticiteti i tregut të punës në eurozonë ka të ngjarë të vijojë të ushtrojë presion për rritjen e pagave, pasi punëtorët kërkojnë që paga e tyre të rritet për tu harmonizuar me rritjen e fundit të inflacionit.
Rritja e pagave në Eurozonë ishte afër 5 për qind në tremujorin e parë. Megjithatë, Carsten Brzeski, një ekonomist në bankën holandeze ING, parashikoi se “vala aktuale e rritjes së pagave duhet të jetë e përkohshme” sepse “ekonomia në stanjacion ka dobësuar planet e rekrutimit”. /The Financial Times/
