Çmimet e naftës ranë të mërkurën mes të dhënave të dobëta ekonomike nga Evropa dhe intensifikimit të përpjekjeve diplomatike për të zgjidhur konfliktin Izrael-Palestinë.
Standardi global i naftës së papërpunuar Brent u tregtua me 87.97 dollarë për fuçi në orën 11:29 GMT, një rënie prej 0.11% nga çmimi i mbylljes prej 88.07 dollarë për fuçi në seancën e mëparshme tregtare të martën.
Standardi amerikan West Texas Intermediate (WTI) tregtohej në të njëjtën kohë me 83.50 dollarë për fuçi, 0.28% më pak nga mbyllja e së martës me 83.74 dollarë për fuçi.
Të dhënat e së martës mbi indeksin e menaxherëve të blerjeve të prodhimit në eurozonë (PMI), që mat aktivitetin e menaxherëve në sektorin e prodhimit, kanë ngritur shqetësimet se një recesion në rajon do të ndikojë negativisht në kërkesën për naftë.
Të dhënat që tregojnë për ngadalësimin e ekonomive të mëdha si Gjermania dhe Britania e Madhe hodhën dyshime mbi kërkesën për naftë.
Investitorët janë në pritje të vendimeve të politikës monetare të Bankës Qendrore Evropiane dhe deklaratave të kryetares së bankës Christine Lagarde pas takimit të së enjtes.
Ndërkohë përpjekjet për t’i dhënë fund tensioneve të përshkallëzuara midis Izraelit dhe Palestinës nxitën lëvizjet në rënie të çmimeve, duke ulur shqetësimet se trazirat në Lindjen e Mesme do të prishin rrugët e furnizimit me naftë.
Lirimi i një pengut izraelit, Yocheved Lifshitz, të martën pasi ajo u mbajt në robërinë e Hamasit për dy javë, dhe fjalimi në të cilin ajo lavdëroi grupin e rezistencës palestineze, kontribuuan gjithashtu në narrativën se tensionet mund të zbuten
Megjithatë, rëniet e mëtejshme të çmimeve u kufizuan nga njoftimi i Institutit Amerikan të Naftës (API) të martën, duke vlerësuar një tërheqje të rezervave të naftës së papërpunuar në SHBA prej 2.6 milionë fuçi, kundrejt pritjeve të tregut për një rritje prej 1.5 milionë fuçi.
Një rënie në inventar nënkupton një rritje të kërkesës së papërpunuar në SHBA, duke zbutur shqetësimet e tregut për rënien e kërkesës.
Të dhënat e publikuara nga S&P Global treguan se PMI e prodhimit amerikan në tetor, i cili u rrit në nivelin më të lartë në gjashtë muajt e fundit, kufizoi gjithashtu rënien e çmimeve. PMI shtoi 0.2 pikë në 50.0 në tetor, nga 49.8 në shtator, sipas vlerësimeve të shpejta nga kompania e shërbimeve financiare.
Pritshmëria e tregut për PMI-në e prodhimit, e cila shënoi nivelin më të lartë që nga prilli, ishte 49.5. Një tregues nën 50 përfaqëson tkurrje, ndërsa mbi 50 tregon zgjerim në sektor. /AA/
