Ministria e Industrisë, Ndërmarrësisë dhe Tregtisë (MINT), ka reaguar mbrëmë për raportimet e mediave se disa operatorë kabllorë kanë larguar disa kanale televizive nga platformat e tyre programore, pa paralajmërim të klientëve paraprakisht.
Ata kanë thënë se janë duke përcjellë me shqetësim ankesat e shumta të qytetarëve ndaj disa operatorëve kabllorë në Kosovë, shërbimet e të cilave janë të rregulluara me kontratë mes palëve.
MINT-i përmes një njoftimi për publikun, ka sqaruar se Departamenti për Mbrojtjen e Konsumatorit në kuadër të këtij dikasteri, vetëm gjatë ditëve të fundit ka pranuar mbi 100 ankesa të natyrës së njëjtë, të cilat i ka proceduar me prioritet për trajtim të mëtejmë nga institucionet gjegjëse
“Ministria e Industrisë, Ndërmarrësisë dhe Tregtisë, siguron qytetarët se brenda afateve ligjore, përmes institucioneve përgjegjëse, do të ndërmerren të gjitha veprimet e nevojshme sipas ligjeve përkatëse në fuqi”, thuhet në komunikatën për media.
Ministria e Industrisë, Ndërmarrësisë dhe Tregtisë, gjegjësisht Departamenti për Mbrojtjen e Konsumatorit dhe Inspektorati Qendror i Mbikëqyrjes së Tregut, kanë thënë se mbeten maksimalisht të përkushtuar për të mbrojtur të drejtat e konsumatorit, për çka iu kanë bërë thirrje qytetarëve që ankesat t’i paraqesin duke telefonuar në numrin pa pagesë: 0800 11000 apo përmes email adresës: konsumatori@rks-gov.net.
