Samiti i Investimeve në Ballkanin Perëndimor do të nis sot punimet në selinë e BERZH-it në Londër.
Samiti do të mbledhë së bashku gjashtë kryeministrat E Ballkanit Perëndimor, Si dhe investitorët ndërkombëtarë, me synimin për të nxjerrë në pah mundësitë e mundshme të investimeve dhe biznesit në rajon dhe për të promovuar projekte rajonale ndërkufitare.
Pjesëmarrës në këtë ngjarje të madhe për ekonominë e vendit do të jenë edhe kryeministri Albin Kurti së bashku me ministrin e Financave, Hekuran Murati.
Kështu është bërë e ditur në një njoftim për media nga Zyra e Kryeministrit.
“Kryeministri Kurti, së bashku me ministrin e Financave, Punës dhe Transfereve, Hekuran Murati, do të marrë pjesë në Samitin për Investime në Ballkanin Perëndimor 2024 të organizuar nga Banka Evropiane për Rindërtim dhe Zhvillim”, thuhet në njoftim.
Ky është samiti i gjashtë i BERZH-it i këtij lloji. Samiti inaugurues i Ballkanit Perëndimor u zhvillua në BERZH dhjetë vjet më parë, në shkurt 2014, duke mbledhur për herë të parë të gjithë krerët e qeverive të rajonit.
Ballkani Perëndimor është një rajon prioritar për BERZH që përfshin Shqipërinë , Bosnje dhe Hercegovinën , Kosovën , Malin e Zi , Maqedoninë e Veriut dhe Serbinë .
BERZH është një nga investitorët më të mëdhenj institucionalë në rajon, duke investuar më shumë se 18 miliardë euro deri më sot. /Telegrafi/
