Të shtunën më 5 prill, në Prishtinë do të mbahet protestë kundër rritjes së çmimit të energjisë elektrike.
Aktivistë dhe qytetarë do të mblidhen në sheshin “Skënderbe”, duke filluar nga ora 15:00, për të shprehur kundërshtimin e tyre ndaj rritjes së tarifave prej 15% të energjisë elektrike.
Protesta është organizuar nga grupi ‘Asnjë cent ma shumë’ me qëllim të ngritjes së zërit kundër varfërisë energjetike.
Reklama e sponzorizuar
Ky grup po ashtu ka dhënë edhe një ide tjetër për qytetarët se si të dërgojnë emaile tek adresa e ZRRE-së, si një mënyrë për të shprehur kundërshtimin ndaj rritjes së çmimit të energjisë elektrike prej 15%, siç edhe është paralajmëruar nga ZRRE.
Postimi i plotë i grupit “Asnji cent ma shumë”:
ZRrE ka propozuar 15% rritje të çmimit të energjisë elektrike. E gjithë kjo pas kërkesës së KEDS-it, që ka fituar statusin e një rituali të përvitshëm ku privatniku kërkon e organi shtetëror zbaton. Si për ironi, tek pas propozimit për shtrejtim, ZRrE ka hapur veshët për konsultim me publikun.
Nga përvoja e hidhur e të kaluarës, por dhe prej ishareteve të së tashmes, ne, qytetarët e Republikës, kemi boll arsye që të jemi të shqetësuar.
28 mars është dita e fundit që ZRrE merr e pret sugjerime. Me hiç shpresë e krejt indinjim le ta bombardojmë me email propozime.
Ne insistojmë: “Asnji cent ma shumë!”
Linku është gati, teksti sugjerues po ashtu. Shkruajmë emrin mbiemrin dhe shtypim dërgo.
Fjala është aksion. Është fillimi i aksionit. Nëse ZRrE nuk kupton me fjalë brengën tonë, shpejt do të shashtriset nga brohorima jonë!
