Ministri në detyrë i Financave, Punës dhe Transfereve, Hekuran Murati, ka reaguar pas publikimit të aktgjykimit të Gjykatës Supreme, e cila ka vendosur të shfuqizojë një nen të një Udhëzimi Administrativ që lidhet me veteranët e luftës së UÇK-së.
Murati ka sqaruar se ky udhëzim nuk është miratuar gjatë mandatit të Qeverisë Kurti, por në vitin 2015, në kohën kur vendi qeverisej nga koalicioni PDK–LDK.
“Nuk bëhet fjalë për shfuqizim të ndonjë udhëzimi administrativ të miratuar gjatë mandatit të Qeverisë Kurti. Udhëzimi në fjalë është miratuar në vitin 2015, në kohën e Qeverisë PDK–LDK”, ka shkruar Murati.
Ai ka ftuar edhe mediat që të përmbahen nga raportimet tendencioze që, sipas tij, gabimisht po e paraqesin vendimin e Gjykatës Supreme si shfuqizim të ndonjë akti të qeverisë aktuale.
Sipas Muratit, Kryeministri Kurti ka qenë ai që ka paralajmëruar heqjen e kufizimeve të punësimit për veteranët e UÇK-së.
Neni i shfuqizuar i Udhëzimit Administrativ parashihte që për të aplikuar për përfitimin e statusit të veteranit të UÇK-së, aplikuesit duhej të dorëzonin edhe një dëshmi nga Administrata Tatimore e Kosovës (ATK) që vërtetonte se nuk ishin të punësuar.
Gjykata Supreme e ka konsideruar këtë nen në kundërshtim me Nenin 16A të Ligjit për Veteranët e Luftës së UÇK-së, i cili ishte ndryshuar dhe plotësuar në vitin 2017 – po ashtu gjatë qeverisjes PDK–LDK.
Ky nen (16A) parashihte kategorizimin e veteranëve në tri kategori, në bazë të periudhës së pjesëmarrjes në luftë. Pas këtij kategorizimi, ligji u mundësonte veteranëve që punojnë jashtë sektorit publik të përfitonin 50% të shumës së benefitit sipas kategorisë përkatëse.
Murati ka bërë të ditur se Ministria e Financave, Punës dhe Transfereve, në bashkëpunim me zyrën ligjore, do të analizojë nëse aktgjykimi i Supremes është i mjaftueshëm për t’u mundësuar përfitime edhe veteranëve që punojnë jashtë sektorit publik, apo nëse do të nevojiten ndryshime ligjore shtesë.
“Sido që të jetë, Kryeministri Kurti tashmë e ka dhënë zotimin publik, dhe ne do të punojmë për ta jetësuar atë zotim sa më parë,” ka përfunduar Murati.
