Rruga B dhe C e “Muharrem Fejza”, zonat më të preferuara në Prishtinë për të blerë banesë

Në bazë të kërkesave të drejtuara agjencive të paluajtshmërive, zonat më të pëlqyeshme për të blerë një banesë në Prishtinë janë ato rreth e qark rrugëve B dhe C, si dhe lagjja “Muharrem Fejza”. Halil Gashi, pronar i agjencisë së paluajtshmërive, VOKO, thotë se numri absolutisht më i madh i blerësve kërkojnë blerjen e banesave në këto zona. Tashmë në masë të ndjeshme janë reduktuar kërkesat për të blerë banesë në lagjen Dardania, dikur ndër zonat që gëzonte përparësi nga blerësit. Pse është bërë “devalvimi i banesave në qytetin e vjetër të Prishtinës”?.

Buletini Ekonomik

Sado që nuk ka ndonjë hulumtim, as matje të sakta në kryeqytet nga ndonjë institucion, apo edhe asociacion kredibil për të vlerësuar më saktësisht zonat më të preferuara dhe më të kërkuara nga klientela për të blerë një banesë, nga përvojat dhe kërkesat që u drejtohen agjencive të paluajtshmërive në Prishtinë, pak a shumë dihen preferencat e klientëve shumicë.

Disa nga agjencitë e paluajtshmërive nuk shprehin asnjë rezervë për të emërtuar zonat aktualisht më të kërkuara për banim në kryeqytet.

Halil Gashi, pronar i Agjencisë së Paluajtshmërive VOKO në Prishtinë, një agjenci me reputacion të ngritur, i ka thënë Buletinit Ekonomik se, në bazë të kërkesave të ardhura në këtë agjenci, zonat më të pëlqyeshme të banimit në Prishtinë, padyshim janë ato rreth e qark rrugëve B dhe C, si dhe lagjja “Muharrem Fejza”.

Gashi thotë se numri absolutisht më i madh i blerësve kërkojnë blerjen e banesave në këto zona.

Sipas Gashit, tashmë në masë të ndjeshme janë reduktuar kërkesat për të blerë banesë në lagjen Dardania, dikur ndër zonat që gëzonin përparësi nga blerësit.

“Tani askush nuk do dhe nuk blen banesë në lagjen Dardania”, thotë i bindur Gashi.

Ai shpreh zhgënjimin e tij edhe për “devalvimin e banesave në qytetin e vjetër të Prishtinës”, siç i emërton ai zonat rreth e rrotull qendrës dhe banesat në lagjen Ulpiana.

Ndërsa, devalvimi i banesave në qytetin e vjetër të Prishtinës, sipas tij, është bërë me fajin ekskluzivisht të Ndërmarrjes Publike Banesore të Prishtinës, trashëgimtare e BVI-së së dikurshme të banesave, e cila asnjëherë nuk e pati punë me përparësi mirëmbajtjen e këtyre banesave.

Përkundrazi, e neglizhoi pafundësisht punën primare për të cilën ekziston sot e kësaj dite dhe i devalvoi banesat në përmasa shqetësuese në “qytetin e vjetër”.

Edhe në qendër dhe rreth e rrotull saj, tashmë nuk ka, pos në raste të rralla, shitblerje të banesave, por as ndonjë tregtim karakteristik të ndonjë prone të paluajtshme.

Ka kohë që nuk ka shitblerje të paluajtshmërive në zonat rreth e qark qendrës, ndërsa çmimet deri vonë për një metër katror të banesave janë sjellë nga 2.500 deri në 3.500 euro.

Ndërsa çmimet në zonat e tjera të Prishtinës, pak a shumë janë këto:

Në Mahallën e Muhaxherëve, që është shumë pranë qendrës, çmimi i një metri katror sillet nga 1.500 deri në 2.000 euro, por është vështirë të gjesh banesë në këtë lagje për shkakun se ato tregtohen shpejt, madje shumë prej tyre që në gurthemelet e tyre.

Aktualisht, në këtë lagje nuk ka banesa të pashitura.

Çmimi i një metri katror të një banese në lagjen Arbëria (ish-Dragodani) lëviz nga 1.350 deri në 2.000 euro.

Në zonën në afërsi të Qendrës Tregtare Minimax, çmimet për një metër katror të banesave aktualisht sillen nga 1.350 euro deri në 1.600 euro.

Në zonën Qendra e Re (zona te Pallati i Drejtësisë), çmimet sillen nga 1.250 euro për një metër katror deri në 2.500 euro.

Kjo diferencë e madhe brenda një lagjeje e çmimit të banesave është krijuar nga cilësia dhe korrektesa e ndërtimtarit.

Pra, varësisht kush është ndërtuesi dhe varësisht nga cilësia e punëve deri te finalizimi, janë edhe çmimet e diferencuara.

Pastaj, cilësia dhe korrektesa e ndërtimtarit kanë ndikim të madh edhe në tregtimin e banesave.

Pronarët e kompanive serioze ndërtuese, pavarësisht luhatjeve të tregut të sektorit të ndërtimit në Kosovë, praktikisht gjithnjë kanë dhe do të kenë shitblerje. Për ta, nuk ka rënie të tregtimit të ndërtimeve të reja. /Buletini Ekonomik/