BQK: Gjatë vitit 2025, në Regjistrin Kreditor të Kosovës u raportuan 347,699 kredi

Gjatë vitit të kaluar, sipas Raportit për vitin 2025 të Bankës Qendrore të Kosovës (BQK), në Regjistrin Kreditor janë raportuar 347,699 kredi.

Në këtë numër përfshihen huatë, kartelat e kreditit, mbitërheqjet, kreditë hipotekare rezidenciale, linjat kreditore, garancionet, lizingu, faktoringu dhe asetet e tjera kreditore.

Në raportimin për kreditë e aprovuara për vitin 2025 prijnë bankat me 192,331 kredi, të ndjekura nga institucionet mikrofinanciare dhe ato jobankare me 141,597, si dhe kompanitë e sigurimeve me 13,771 kredi të aprovuara.

Në vitin 2025 është vërejtur një rënie e numrit të kërkesave për raportin kreditor të kredimarrësve në BQK, si për personat fizikë ashtu edhe për ata juridikë.

Në raportin e BQK-së thuhet se kjo tendencë lidhet me mundësinë e qasjes dhe shkarkimit të raportit kreditor elektronik përmes platformës eKosova, e cila e ka lehtësuar ofrimin e këtij shërbimi, duke u mundësuar kredimarrësve ta sigurojnë atë në mënyrë të drejtpërdrejtë nga platforma.

Sipas raportit të BQK-së, me Regjistrin Kreditor, BQK-ja mund të operojë, të rregullojë, të licencojë, të regjistrojë dhe të mbikëqyrë sistemet e informacionit të kredive, me qëllim të mbledhjes dhe shpërndarjes së informacionit të kredive mes institucioneve kredidhënëse, si dhe mund të nxjerrë rregullore për zbatimin përkatës.

Të ngjashme:

Qytetarët e Kosovës kanë 528 milionë euro kredi aktive në institucionet mikrofinanciare

Bazuar në këtë objektiv, që nga viti 2006, BQK-ja ka nën menaxhim sistemin e Regjistrit të Kredive (RKK), i cili funksionon si një aplikacion i bazuar në internet dhe ka për qëllim mbledhjen dhe shpërndarjen e informatave pozitive dhe negative për personat fizikë dhe juridikë, me qëllim të përmirësimit të procesit të vlerësimit të klientëve kredimarrës, si dhe realizimin e funksionit mbikëqyrës të BQK-së.

Në raportin për vitin 2025 të BQK-së thuhet se: “Nga një perspektivë e përgjithshme ekonomike, Regjistri i Kredive lehtëson procesin e kredidhënies, si në aspektin e vëllimit ashtu edhe të kostos, duke kontribuar njëkohësisht në forcimin e stabilitetit financiar në përgjithësi.”

Përmes funksionit të tij, Regjistri mbështet kredidhënësit në marrjen e vendimeve më të shpejta, më të sakta dhe më objektive, duke përmirësuar cilësinë e vlerësimit të rrezikut kreditor.

Në bazë të Rregullores për Regjistrin e Kredive, anëtarë të sistemit të RKK-së janë të gjitha institucionet financiare të përcaktuara nga BQK-ja si ofrues të kredive, duke përfshirë të gjitha bankat komerciale dhe institucionet mikrofinanciare të licencuara, si dhe institucionet financiare jobankare dhe kompanitë e sigurimeve të licencuara për ushtrimin e aktiviteteve të caktuara kreditore. /Buletini Ekonomik/