Kuvendi i Kosovës ditën e premte pritet të mbajë interpelancën për faljen e borxheve dhe gjobave për bizneset e prekura nga pandemia COVID-19.
Këtë e ka konfirmuar shefi i Grupit Parlamentar të Aleancës për Ardhmërinë e Kosovës, Besnik Tahiri duke shtuar se falja e borxheve duhet të ndodhë, përcjell Telegrafi.
“U vendos që ditën e premte nga ora 10:00 të ndodh interpelanca e cila e ka ftuar grupi ynë parlamentar me çështjen e faljes së borxheve si formë ndihmëse për bizneset të prekura nga situata e pandemisë COVID-19. Pra në këtë takim është konfirmuar kërkesa jonë për interpelancë. Kemi kërkesë të qartë ndaj ministrit të Financave [Hekuran Murati], që të ndodh falja e të gjitha gjobave për bizneset e prekura apo janë prekur në kohë pandemie, për shkak se kjo është një ngarkesë për ta”, tha Tahiri.
Po ashtu, kryetari i Odës Ekonomike të Kosovës, Berat Rukiqi në një konferencë për medie i kishte bërë thirrje Qeverisë për faljen e gjobave që janë shqiptuar gjatë kërkesave për zbatimin e masave dhe mundësinë për një amnisti fiskale për bizneset.
