Më shumë se 40 vende angazhohen për të eliminuar përdorimin e qymyrit në samitin e klimës COP26, thotë qeveria britanike.
Shtetet kryesore që përdorin qymyr, përfshirë Poloninë, Vietnamin dhe Kilin, janë ndër vendet që do të bëjnë angazhimin.
Por disa nga vendet më të mëdha në botë të varura nga qymyri, përfshirë Australinë, Indinë, Kinën dhe SHBA-në, nuk e nënshkruan këtë zotim.
Qymyri është kontribuuesi më i madh në ndryshimin e klimës.
Nënshkruesit e marrëveshjes janë zotuar t’i japin fund të gjitha investimeve në prodhimin e energjisë së qymyrit brenda dhe jashtë vendit.
Gjithashtu është rënë dakord të hiqet dorë nga energjia e qymyrit deri në vitet 2030 për ekonomitë e zhvilluara dhe deri në vitet 2040, për vendet më të varfra, deklaroi qeveria britanike.
Me dhjetëra organizata nënshkruan gjithashtu zotimin, dhe disa banka të mëdha ranë dakord të ndalonin financimin e industrisë së qymyrit.
“Fundi i qymyrit është në horizont,” tha sekretari i biznesit dhe i energjisë në Mbretërinë e Bashkuar, Kwasi Kwarteng.
“Bota po ecën në drejtimin e duhur, duke qëndruar gati për të vulosur një herë e mirë fatin e qymyrit dhe për të përqafuar përfitimet mjedisore dhe ekonomike të ndërtimit të një të ardhmeje që mbështetet në energjinë e pastër.”
Por sekretari i biznesit në Mbretërinë e Bashkuar, Ed Miliband, tha se kishte “boshllëqe të dukshme” nga Kina dhe emetuesit e tjerë të mëdhenj, të cilët nuk janë zotuar të ndalojnë rritjen e përdorimit të qymyrit brenda vendit. Ai gjithashtu vuri në dukje se nuk ishin bërë premtime për eliminimin gradual të naftës dhe gazit.
Miliband tha se qeveria e Mbretërisë së Bashkuar “nuk është treguar e rreptë sa ç’duhet”.
Megjithëse është bërë përparim në reduktimin e përdorimit të qymyrit në nivel global, ai ende prodhon rreth 37% të energjisë elektrike në botë në vitin 2019.
Vende si Afrika e Jugut, Polonia dhe India do të kenë nevojë për investime të mëdha për t’i bërë sektorët e tyre të bazuar në energji më të pastër.
Juan Pablo Osornio, kreu i delegacionit të Greenpeace në COP26, tha: “Në përgjithësi, kjo deklaratë është ende shumë larg ambicieve të nevojshme për karburantet fosile në këtë dekadë me rëndësi kritike.”/ BBC
