Për 15.5 milionë euro janë rritur të hyrat tatimore për një vit në Kosovë, sipas të dhënave të prezantuara nga Qeveria.
Në një komunikate për media të premten, nga Zyra e Kryeministrit kanë thënë se të hyrat e muajit janar janë 96.7 milion euro tatime, që në krahasim me periudhën e njëjtë të vitit të kaluar ka rritje për 19.2 për qind.
“Muaji i parë i këtij viti ka reflektuar me të hyra të konsiderueshme tatimore, çka nënkupton se është një nismë e mbarë në realizimin e projeksionit për këtë vit”, thuhet në njoftimin e Qeverisë.
“96.7 milion euro tatime, janë të hyrat e muajit janar që në krahasim me periudhën e njëjtë të vitit të kaluar kemi rritje për 15.5 milion euro apo 19.2%. Ndërsa, kontributet pensionale janë 18 milion euro”.
Tutje, thuhet se Administrata Tatimore e Kosovës këtë vit përveç prioriteteve kryesore që ka në mbledhjen e të hyrave, borxheve dhe vazhdimin e avancimit të shërbimeve profesionale për tatimpagues, ka në synim edhe implementimin e Planit Strategjik, implementimin e projekteve për përmirësimin e përmbushjes në sektorët me rrezik, etj.
“ATK falënderon tatimpaguesit për kryerjen e detyrimeve tatimore, në të njëjtën kohë kërkon nga ta që të vazhdojnë të jenë kontribuues në zhvillimin e vendit tonë”, përfundon komunikata.
