Oda e Afarizmit të Kosovës organizoi sot një tryezë diskutimi lidhur me ligjin për TVSH-në, ligjin e punës dhe pushimin e lehonisë.
Sipas kryetarit të OAK, Skender Krasniqi, 341 mijë persona janë të punësuar në Kosovë në të gjitha sektorët, ndërsa vetëm ai privat numëron 240 mijë. Aty po ashtu u rekomandua që pushimi i lehonës të paguhet 100 përqind nga shteti, sepse është në dëm të bizneseve private që për një vend pune detyrohen të paguajnë dy persona.
Pjesëmarrës në këtë tryezë ishte edhe zëvendëskryeministri, Fatmir Limaj, i cili mes tjerash tha se dikasteret e qeverisë duhet t’i marrin seriozisht rekomandimet dhe sugjerimet e bizneseve.
“Prodhimi vendor shpeshherë i është ekspozuar një konkurrence të pabarabarte. Mungesa e një kujdesi institucional ka sjellë pasoja. Ligjin për TVSH-në, atë që na u sugjerua nga Oda e Afarizmit, do ta kemi parasysh”.
“Duhet të stimulohen punëtorët. Nataliteti është duke rënë dhe për këtë duhet të ndërmarrim politika qe ta stimulojmë rritjen e tij”, deklaroi Limaj, duke kërkuar që punëtorëve t’u respektohen të drejtat dhe të trajtohen mirë.
Rreth rënies së natalitetit foli edhe ministri i Punës dhe Mirëqenies Sociale, Skender Reçica, i cili deklaroi se ligji i ri i punës do të jetë lehtësim edhe për bizneset por edhe për punëtorët dhe se me ligj të veçantë për herë të parë po trajtohen lehonat. Ai po ashtu u shpreh se do të punohet në respektimin e sigurisë së punëtorëve.
