Sindikata e Bashkuar e Arsimit ka gjetur një arsyetim të ri në këmbim të zëvendësimit të orëve të humbura gjatë grevës. Këtë herë janë duke kërkuar ndryshimin e koeficientëve për mësimdhënësit e ciklit klasor në mënyrë që të barazohen me mësimdhënësit e ciklit lëndor, raporton Gazeta Express
Përmes një komunikate dërguar mediave, nga SBASHK po thonë se janë të vendosur që të presin vendimin e Gjykatës për zëvendësim të orëve.
“Nëse MASHT dhe deputetët në një seancë të parlamentit ndryshojnë koeficientet për mësimdhënësit e ciklit klasor dhe e barazojnë me ato të mësimdhënësve të ciklit lëndor, atëherë për hir të kolegëve të ciklit klasor do të apelojmë te mësimdhënësit e Kosovës që të zëvendësojnë mësimin për një javë në fund të vitit mësimor”, thuhet në reagim
Tutje, ata kanë bërë të ditur se sot gjatë ditës janë takuar edhe me Ministrin e Arsimit, Shyqyri Bytyqin, ku kanë diskutuar për situatën aktuale dhe ku kanë paraqitur kërkesën e re për ndryshim të koeficientit.
“Kryetari i SBAShK-ut në këtë takim paraqiti edhe një mundësi para Ministrit Bytyqi që kjo gjendje të zhbllokohet nëse Ministri Bytyqi bashkërisht me deputetët e partisë Nisma Socialdemokrate dhe deputetët e partive tjera të ftojnë një seancë të jashtëzakonshme me qëllim të përmirësimit të koeficientit për mësimdhënësit e ciklit fillor 1 deri 5 në Ligjin e pagave dhe të barazohet me koeficientin e mësimdhënësve të ciklit të mesëm të ulët 6 deri 9 pasi Ligji i pagave është në fuqi dhe ka dalë në Gazetën zyrtare, ndërsa zbatimi i tij fillon në fund vit dhe në këtë rast SBAShK do të merr për obligim të bisedoj me mësimdhënësit që në fund vitin shkollor 2018/2019 të zëvendësojnë një javë në shenjë të vullnetit të mirë për mësimdhënësit e ciklit fillor 1-5”, shkruhet në komunikatë.
Ndryshe, këtë javë Ministria e Arsimit kishte kërkuar që të mos mbahet pushimi pranveror por të zëvendësoheshin orët të cilat ishin humbur gjatë grevës. Mirëpo, këtë kerkesë nuk e kanë përfillur SBASHK-u./Gazeta Express
