Institucionet shqiptare e kanë bërë aq keq punën e tyre, saqë i kanë bërë shqiptarët popullin që ka besimin më të lartë nga çdo shtet tjetër europian në institucionet e BE-së.
Sipas një raporti të Eurostat, gati 80 për qind e popullsisë së Shqipërisë kishin besim të lartë të Parlamentin Europian me 2018. Kjo ishte përqindja më e lartë e besimit në raport me shtetet e tjera europiane.
Pas Shqipërisë besimin më të lartë në institucionet e BE-së e kanë shtetet anëtare të BE-së si: Suedia, Belgjika, Finlanda, Holanda, Danimarka etj, ndërsa besimin më të ulët e kishte Britania e Madhe, Greqia, Spanja, Çekia, Sllovenia, Franca etj.
Shqipëria ka gjithashtu besimin më të lartë në institucionet e BE-së edhe në krahasim me vendet e tjera të Rajonit, teksa Serbia dhe Turqia paraqiten me besimin më të ulët.
Ky besim i lartë i shqiptarëve tek BE-ja reflektohet edhe në përdorimin e lartë të euros si monedhë për transaksione. Në një studim të publikuar së fundmi “Roli Ndërkombëtar i Euros”, BQE referon se preferenca për euron është veçanërisht e lartë në Shqipëri dhe Serbi.
BQE ka vërejtur se pas krizës së borxheve në Eurozonë të vitit 2009 ka nisur të bjerë besimi ndaj euros i koordinuar edhe me politikat kombëtare të vendeve. Por Shqipëria dhe Serbia vijuan të kenë nivelin më të lartë të përdorimit të euros në transaksionet e tyre cash në raport me vendet e tjera.
Besimi i lartë tek institucionet e BE lidhet me faktin se shqiptarët nuk kanë besim tek institucionet e tyre publike. /Monitor/
