Në kohën kur vendi është afër zgjedhjeve parlamentare, në shumë prej dikastereve qeveritare janë shpeshtuar konkurset publike duke ngritur dyshime serioze për punësime politike. Një fenomen i tillë vërehet edhe tek Ministria e Tregtisë dhe Industrisë (MTI), që udhëhiqet nga Endrit Shala i partisë Nisma Social Demokrate.
Vetëm në dy javët e fundit në këtë ministri janë shpallur gjashtë konkurse për pozita të ndryshme, përcjell Buletini Ekonomik.
Krahasuar me muajt e kaluar, sipas ueb faqes së kësaj ministrie, vërehet një rritje e konkurseve në dy muajt e fundit.
Pozitat e shpallura së fundi në MTI janë: Zyrtar i Lartë për Tregti, Zyrtar i bazës së të dhënave, Zyrtar i lartë për teknologji informative në KIESA, Zyrtar për mbrojtjen e konsumatorit, Asistent administrativ dhe Udhëheqës i Divizionit për Mallra Ushtarake Tranzit dhe Brokerim. /Buletini Ekonomik/
