Sindikata e Shërbyesve Civilë të Kosovës është njëra prej rreth 20 sindikatave që kanë kundërshtuar Ligjin për Pagat në Sektorin Publik, i cili u pezullua sot me vendim të Gjykatës Kushtetuese.
Kjo sindikatë javë më parë dorëzoi një ankesë zyrtare në lidhje me Ligjin për Pagat tek institucioni i Avokatit të Popullit, dhe përmes një kërkese të këtij institucioni, Gjykata Kushtetuese vendosi ta pezullojë këtë ligj.
Rreth 23 mijë shërbyes civilë në administratën lokale dhe qendrore të Kosovës janë shprehur të pakënaqur me Ligjin për Pagat.
Paga mesatare e shërbyeseve civilë në Kosovë është 370 euro në muaj, kurse me ligjin e ri, disa nga shërbyesit civilë pagat mund të merrnin një rritje për 40 euro në muaj.
Kjo sindikatë edhe para nënshkrimit të Ligjit për pagat, më 2 shkurt të këtij viti, kishte mbajtur disa greva, ndërkohë që kishte kërkuar nga presidenti i Kosovës, Hashim Thaçi, që të mos e ratifikonte Ligjin për paga. /Insajderi.com
