Edhe pse ligji ua ndalon që të jenë pjesë e partive politike, pa miratim paraprak, një zyrtar i lartë i AKI-së është kapur nga kamerat duke marrë pjesë në kuvendin e Partisë Demokratike të Kosovës.
Ishte kuvendi i Partisë Demokratike të Kosovës (PDK) në Drenas që kishte kapur vëmendjen e mediave.
Në këtë takim, situatën e bëri më atraktive një nga figurat e kësaj partie, Naim Bazaj. Ai kishte pasur disa lëvizje brenda dhe jashtë kësaj partie, por edhe partive të tjera.
Ky kuvend i viti të kaluar të PDK-së, që nuk kaloi i qetë pasi që Bazaj nuk u nda i kënaqur nga votimi në të, kishte lënë larg vëmendjes së publikut pjesëmarrjen e një zyrtari të lartë të Agjencisë Kosovare për Inteligjencë.
Kamera ka kapur në këtë ngjarje Bujar Bazajn, sipas informacioneve që ka Insajderi, Shef i Hetimeve pranë Zyrës së Kryeinspektorit të AKI-së.
Bazaj njihet edhe si mik i ish-shefit të AKI-së, Bashkim Smakaj, i cili pas largimit nga kjo pozitë është angazhuar në kabinetin e Presidentit Hashim Thaçi, ish-kryetar i PDK-së.
Neni 17 i ligjit për AKI-në përmend sjelljet e ndaluara të punonjësit të këtij institucioni.
“Punonjësit e AKI-së nuk mund të jenë anëtarë të partive politike apo marrin udhëzime prej partive, organizatave apo lëvizjeve politike, apo individëve jashtë AKI-së, e as nuk mund të kryejnë çfarëdo aktiviteti apo detyra tjera publike apo profesionale me pagesë, të cilat nuk janë në përputhje me punën e AKI-së. Punonjësit e AKI-së kërkojnë miratimin paraprak të drejtorit të AKI-së para së t’i bashkohen cilësdo organizate apo grupi; dështimi për të raportuar këtë mund të ofrojë bazë për suspendim apo përjashtim të Punonjësit të AKI-së”, thuhet aty, shkruan Insajderi.
Insajderi e ka pyetur AKI-në nëse Bujar Bazaj ishte me detyrë nga AKI-ja në kuvendin e PDK-së, por të njëjtit ende nuk janë përgjigjur.
AKI kohën e fundit ka pasur ndryshime në njerëzit që e drejtojnë agjencinë. Së fundi është emëruar Drejtor i saj Kreshnik Gashi, ish-anëtar i PDK-së, kryetar i Bordit të AKREP dhe ish-sekretar në Ministrinë e Punëve të Jashtë të Kosovës, në kohën sa këtë ministri e drejtonte Hashim Thaçi.
Gazeta Insajderi pati publikuar një fotografi të Gashit bashkë më Artan Nimanin, i njohur në publik përveç të tjerash edhe si mik u afërt i të dyshuarit për mashtrim dhe marrje të ryshfeti Rrahim Hashimi.
Në të njëjtën kohë me Gashin, në pozitën e Kryeinspektorit në këtë dikaster ishte emëruar një nga vartësit e partisë së Ramush Haradinajt, Burim Ramadani.
I njëjti ishte anëtarë i Aleancës për Ardhmërinë e Kosovës. Ai po ashtu mbante pozitën e zëvendësministrit në Ministrinë e Mbrojtjes. Gjithashtu Ramadani ishte kandidat për deputet nga radhët e AAK-së në zgjedhjet e 6 tetorit.
