Kryeministri i Republikës së Kosovës, Albin Kurti, priti sot nënkryetarin e Parlamentit Evropian, z. Rainer Wieland, i shoqëruar nga shefja e programit “Education unlimited e.V.”, znj. Kerstin Zielosko, kryetari i komunës Korntal-Münchingen (Shtutgart), dr. Joachim Wolf, drejtori i Rosenstein-Secondary-school në Heubach (Schwäbisch Gmünd), z. Miller, administratorin e EDEKA Südwest, z. Rudolf Matkovic, shefen e Deskut të z. Wieland, znj. Angela Schweizer.
Në takim morën pjesë edhe ministrja e Arsimit, Shkencës, Teknologjisë dhe Inovacionit, Hykmete Bajrami, dhe. Jan-Axel Voss, zëvendësshef i misionit gjerman.
Nënkryetari i Parlamentit Evropian, z. Wieland, shprehu entuziazmin për formimin e qeverisë së re dhe për synimin e saj për ta luftuar korrupsionin. Korrupsioni e rrit mosbesimin e qytetarëve dhe e bën të pamundur funksionalizimin e vërtetë të institucioneve.
Kryeministri konfirmoi nga ana e tij këtë pritshmëri të brendshme dhe të jashtme. Zhvillimi i ekonomik sjell punësim dhe luftimi i korrupsioni sjell drejtësi. Lufta ndaj korrupsionit do të bëhet në koordinim me të gjithë aktorët.
Mes temave të tjera të përmendura prej z. Wieland ishin shkëmbimi i përvojave në fushën e arsimit, vënia e theksit në politikat komunale, nxitja e edukimit në fushën e administratës publike si dhe nxitja e prodhimit vendas.
Ndaj edhe kryeministri Kurti nënvizoi se investimet nga jashtë ndihmojnë strukturimin e ekonomisë së brendshme. Pikënisje është mërgata e cila duhet të ndjehet e sigurt. Investimi i saj do të gjejë këtu punën dhe ligjin. Suksesi i mërgatës në Kosovë do të shërbejë si dëshmi për investuesit e tjerë të huaj. Për punën vlen modeli i sistemit dual, sipas përvojës së Gjermanisë, Austrisë dhe Zvicrës. Ndërlidhja e arsimit cilësor me korrektësinë e tregut të punës përbën një strategji që e tejkalon mandatin elektoral.
