Herët në mëngjesin e së premtes Policia e Kosovës ka nisur bastisjen e zyrave të Telekomit të Kosovës.
Aksioni i Policisë ka të bëjë me dyshimet për një kontratë njëmilionëshe të ndërmarrjes dhe keqpërdorimin e rreth 100 mijë eurove nga buxheti i shtetit.
Për këtë janë shoqëruar për intervistim në Polici 4 zyrtarë të Telekomit si të dyshuar për keqpërdorim të detyrës zyrtare dhe për lidhje të kontratës së dëmshme, raporton KOHA.
Policia gjithashtu ka konfiskuar si dëshmi materiale të ndryshme gjatë bastisjes, e zyrtarë të Telekomit kanë thënë se ky rast ishte iniciuar nga vetë ata.
KOHA ka siguruar kallëzimin penal që kryeshefi i Telekomit, Bedri Istrefi, ia kishte bërë një personi me emrin Avdi Limani, në janar të këtij viti.
Aty thuhet se Avdi Limani më 20 dhjetor të vitit 2019 në zyrat e Telekomit të Kosovës përmes dokumenteve të falsifikuara ka vënë në lajthitje zyrtarët e ndërmarrjes.
Limani kishte falsifikuar dokumentet dhe vulën duke u prezantuar si person i autorizuar i kompanisë “Tera Kosova”, ani se nuk ishte i tillë dhe në këtë cilësi kishte nënshkruar marrëveshjen për pagesën e borxhit në shumë prej 247 mijë eurosh.
Kjo pagesë ishte kryer në 3 këste, derisa pagesa e parë në shumën prej 105 e 840 eurosh ishte realizuar në xhirollogarinë e kompanisë “Keramika ART” me pronar Arben Taçi.
Bazuar në të dhënat e ARBK-së, kjo kompani është hapur në nëntor të 2019-s, derisa vetëm një muaj më vonë në llogari të saj janë derdhur paratë e Telekomit.
KOHA ka tentuar të vërë kontakt me Taçin, por ai ka qenë i paqasshëm.
Në kontratën e siguruar nga televizioni, mes “Tera Kosovës” dhe Telekomit, në emër të kësaj të fundit ka nënshkruar ish-kryeshefi i ndërmarrjes Agron Mustafa, kurse Mirce Atanosovcki si përfaqësues i kompanisë “Tera Kosova”.
Sipas informacioneve të KOHËS, kontrata u nënshkrua për t’ua ofruar klientëve të VALA-s parashikimin e horoskopit dhe rezultatet e ndeshjeve futbollistike përmes SMS-ve.
Kontrata në total kap vlerën e rreth 1 milion eurosh, prej tyre mbi 688 mijë euro u ishin paguar paraprakisht përfaqësuesve të “Tera Kosovës”, por dyshimet për keqpërdorim ishin ngritur në pagesën e fundit, kur ishte paraqitur Avdi Limani si përfaqësues i kësaj kompanie.
Policia nuk ka dhënë detaje nëse ka arritur ta arrestojë Limanin.