AAK përmes një konference për media ka propozuar që secili qytetarë të mbështetet me nga 100 euro nga Qeveria e Kosovës.
Gazmend Abrashi nga AAK ka thënë se si kurrë më parë qytetarët duhet ta ndjejnë dorën e shtetit.
“Si kurrë më parë secili qytetar duhet ta ndjejë dorën e shtetit, andaj ne si AAK propozojmë që të ndahen si mbështetje për secilin qytetar nga 100 euro”, ka thënë Abrashi.
Sipas tij mbështetja do të shpërndahej bazuar në ekstraktet familjare në secilën Komunë.
Masat e propozuara për krizën ekonomike nga Qeveria e Kosovës sipas AAK-së nuk mjaftojnë, raporton KOHA.
Në një konferencë për media Abrashi tha se implentimi i tyre po shkon ngadalë dhe është i ngarkuar me procedura dhe paqartësi që sipas tij do të shkaktojnë vonesa dhe do të ndikojnë në rritjen e pasigurisë ekonomike.
Sipas AAK-së në këto masa nuk janë të përfshirë shumë kategori si punëtorët pa kontrata e ekonomitë familjare, të vetëpunësuarit, nënat vetushqyese. Ky subjekt politik ka kërkuar që të bëhet urgjent rishikimi i buxhetit, me arsyetimin që të rialokohen mjetet bazuar në nevojat e komunave të vendit.
