Shqipëria dhe Mali i Zi patën progresin më të ulët në sektorin e pagave gjatë periudhës 2008-2018, ndërsa në rajonin e Europës Lindore dhe Ballkanit Perëndimor pagat u rritën me ritme më të larta për këtë periudhë.
Instituti për Studime Ndërkombëtare i Vjenës publikoi së fundmi një analizë për ecurinë e pagave në sektorë të ndryshëm në vendet e Europës Lindore dhe vuri në dukje se, pagat në sektorin e prodhimit ishin rritur ndjeshëm në katër vitet e vëzhgimit, përveçse në Shqipëri.
Nga viti 2008 në 2018, rritja pagave reale e neto në Shqipëri ishte vetëm 3%, ndërsa rritja e pagave në sektorin e prodhimit ishte gati 9%. Ndërsa Serbia, Maqedonia, Bosnja kanë përjetuar rritje të pagave në sektorin e prodhimit me afërsisht 20% gjatë 10 viteve, 2008-2018.
Zhvillime negative në sektorin e pagave u vunë re në Malin e Zi, ku rritja e përgjithshme e pagave ishte vetëm 1,5%, teksa pagat në sektorin e prodhimit në vendin fqinjë shënuan rënie me mbi 15%.
Studimi vë në dukje se në shumicën e vendeve të rajonit, pagat në sektorin e prodhimit janë rritur me një normë më të lartë se pagat në sektorët e tjerë. Kjo ecuri ka qenë e njëjtë me pagat në sektorin e prodhimit në Europën Qendrore.
Ecuria e pagave tregon që produktiviteti ka qenë më i lartë në sektorin e prodhimit, kryesisht industrisë.
Në të gjithë rajonin, pagat në sektorin e shërbimeve financiare u rritën më pak se 10%, për shkak të tkurrjes së sektorit.
Për shumë vite, dinamika e pagave ishte me dobët në sektorin e shërbimeve megjithëse është përshpejtuar kohët e fundit.
Por me gjithë ndryshimet, punët më të paguara në rajon, ofrohen nga shërbimet financiare, informacioni dhe komunikimi dhe furnizimi me energji. Pagat në këta sektorë janë përgjithësisht 60-80% më shumë se mesatarja kombëtare.
