400 mostra janë marrë për t’u testuar për COVID-19 të martën, rezultatet e të cilave do të bëhen të ditura nesër në orën 15:00, është bërë e ditur nga Instituti Kombëtar i Shëndetësisë Publike.
Ky institut, përmes një njoftimi ka bërë të ditur se pikërisht në orën 15:00 tani e tutje do të bëhen të ditura shifrat e të infektuarve, të shëruarve dhe të vdekurve.
“Me qëllim të informimit në një kohë sa më të përshtatshme për publikun për rezultatet e testimeve për SARS-COV-2 nga ana e Institutit Kombëtar të Shëndetësisë Publike të Kosovës; përkatësisht për numrin e mostrave të analizuara, numrin e atyre që rezultojnë pozitiv në Covid-19, numrin e të shëruarve, numrin e të vdekurve, numrin e rasteve aktive si dhe shpërndarjen e tyre sipas komunave, duke filluar nga dita e nesërme, 15 korrik 2020, ky informacion do të ndahet me publikun çdo ditë në ora 15:00, qoftë përmes konferencave për media, lidhjeve të drejtpërdrejta apo formave të tjera të përshtatshme për publikun”, shkruhet në njoftim.
Deri më tash në Kosovë janë shënuar 5118 raste me koronavirus, ndërsa kanë vdekur 108, pa përfshirë rastet e sotshmne të bëra të ditura nga spitalet regjionale veç e veç.
