Sot është mbajtur mbledhja e Komitetit për koordinimin dhe vlerësimin e situatës emergjente ku është diskutuar rreth situatës epidemiologjike me COVID0-19.
Në takimin e kryesuar nga ministri i Shëndetësisë, Armend Zemaj, është folur për lirimin e masave anti-Covid.
Gazeta Express mëson se Zemajt i është kërkuar ta zgjasë orarin e punës së sektorit të gastronomisë dhe orarin e lëvizjes deri në orën 00:00.
Asociacioni i Komunave të Kosovës ka kërkuar që orari të zgjatet për shkak se si pasojë e pandemisë, sektori i gastronomisë ka pësuar humbje të mëdha.
Po ashtu, për shkak të rënies së temperaturave, është kërkuar që lokaleve të iu lejohet edhe puna në hapësirat e mbyllura.
Pas takimit, Zemaj ka thënë se lirimi i masave do të bëhet në bazë të vlerësimit të situatës.
“Vlerësimet e përgjithshme rreth situatës epidemiologjike janë stabile, janë me një ecje të sigurt në menaxhimin e kësaj situate”.
“Pavarësisht numrit të rënies së infeksionit, stabilitetit që e kemi në institucionet tona shëndetësore kjo tregon që lufta e përbashkët me qytetarët është treguesi i qartë që zbatimi i masave të marra nga qeveria e Kosovës, rekomandimet e IKShPK-së dhe të miat kanë treguar rezultate të cilat duhet të përcillen”, ka thënë Zemaj.
Ai iu ka bërë thirrje deputetëve që të votohet ligji për Rimëkëmbjen Ekonomike.
Mes tjerash Zemaj ka thënë se nuk duhet të lëshohemi menjëherë në masa, edhe pse në vendin tonë situata është më e mirë se vendet e rajonit.
“Rekomandimet lidhen edhe me aspektin e riorganizimit të mëtutjeshëm të institucioneve tona. Do të bëjmë rikthimin gradual të te gjitha shërbimeve në spitalet tona. Kjo është domosdoshmëri”.
“Me këtë siguri do të ecim edhe në vlerësimin e masave të reja qoftë në kufizimin kohor por edhe në disa aspekte në gastronomi, disa lirime në aktivitete sportive që ndërlidhen me garant ndërkombëtare. Lirimi i masave ka të bëjë me vlerësimin të cilin e kemi të situatës, personalisht dhe në emër te MSh jemi pak konservativ në ecjen apo në lirimin e tepruar. Nuk do të lejojmë që asnjë gabim i cili mund të na shkaktojë ndonjë problematik”.
