Rreth 2 000 punëtorë teknikë në spitalet dhe Qendrat e Mjekësisë Familjare kanë hyrë në grevë, pas mosplotësimit të kërkesave për pagesat shtesë nga qeveria.
Kryetari i Sindikatës së Pavarur të Sektorit Privat të Kosovës, Jusuf Azemi, ka thënë se në të gjithë vendin, me përjashtim të QKUK-së, do të hyjnë në grevë.
“Në këtë grevë do të marrin pjesë të gjitha spitalet regjionale që kanë punëtorë të sektorit privat dhe ambulancat dhe qendrat e mjekësisë familjare”, ka thënë ai.
Kërkesës për grevë i janë përgjigjur edhe punëtorët e Qendrës Kryesore Familjare në Prishtinë. Ata kanë bojkotuar punën dhe janë mbledhur në korridorin e qendrës.
Adem Borovci, përfaqësues i punëtorëve të sigurimit që punojnë në të gjitha Qendrat e Mjekësore në Prishtinë, ka thënë se kërkesat e tyre duhet të zbatohen dhe se edhe ata e meritojnë të jenë pjesë e Pakos Emergjente.
“Ne kemi dalë sot edhe një herë për të shprehur kërkesat tona duke shpresuar që këto kërkesa do të miratohen dhe do të zbatohen”, tha Borovci
Kumrije Shabani, përfaqësuese e punëtorëve të higjienës, u shpreh që greva nuk do të ndalet derisa kërkesat e tyre të realizohen.
“Greva nuk do të ndalet, ne do vazhdojmë deri sa kërkesa jonë të aprovohet dhe të kemi drejtat e barabarta”.
Ministri i Shëndetësisë, Armend Zemaj, në orët e para të mëngjesit ka mbledhur në takim kreun e Sindikatës së Pavarur të Sektorit Privat, Jusuf Azemin dhe u.d e drejtorit të ShSKUK-së, Valbon Krasniqin, në zyrën e këtij të fundit. Takimi ka ndodhur pasi rreth 2 000 punëtorë teknikë në spitalet dhe Qendrat e Mjekësisë Familjare kanë hyrë në grevë, pas mosplotësimit të kërkesave për pagesat shtesë nga Qeveria.
Përjashtim nga ta do të bëjnë punëtorët në QKUK, ngase të njëjtit nuk përfillën kërkesat e sindikatës, të cilët ndaluan punën për disa orë gjatë javës.
Nga Sindikata e Pavarur e Sektorit Privat kanë bërë thirrje të mos u bëhet presion punëtorëve, pasi ligjërisht ata që e bëjnë këtë dënohen nga 500 deri në 5 mijë euro.
