Ethereum është një tjetër kriptomonedhë apo monedhë virtuale, rival i Bitcoin. Vlera e Ethereum ka arritur në 3 mijë Dollarë, 4-fish më e madhe në krahasim me vitin e kaluar.
Kriptovaluta Ethereum, për herë të parë ka kaluar vlerën e 3 mijë dollarëve në disa prej bursave kryesore, përfshirë Bybit, Coinbase dhe BitMEX. Vlera e kriptovalutës së dytë më të madhe, sot i është rritur vlera në rreth 3.200 dollarë amerikanë, që nënkupton një rritje prej 11 për qind brenda një dite, transmeton Telegrafi.
Investitorët thonë se kjo monedhë virtuale do të rritet akoma më shumë dhe do të jetë një ndër kriptomonedhat kryesore në sistemin financiar.
Aktualisht Ethereum është shndërruar në monedhën e dytë virtuale më të fuqishme, duke u renditur pas Bitcoin, vlera e së cilës është rreth 60 mijë Dollarë.
Një analist ka thënë për The Sun se Ethereum mund të kapë shifrën e 5 mijë Dollarëve brenda një kohe shumë të shkurtër.
Vlera e kësaj kriptomonedhe është rritur me më shumë se 1300 përqind në më pak se 1 vit, dhe aktualisht po tejkalon Bitcoinin sa i përket rritjes së përqindjes.
E kur bëhet fjalë për një javë, vlera e Ethereum është rritur për 30 për qind, kurse nga fillimi i vitit është katërfishuar.
Sa i përket kapitalizimit të përgjithshëm të tregut, Ethereum, me 368 miliardë dollarë, ka tejkaluar korporatat si Walt Disney, Nestle dhe Bank of America.
