Ndërmarrja Termokos ka reaguar ndaj shkrimit të Buletinit Ekonomik, të botuar me datë 10/07/2021 me titull “Terkomos paralajmëron shtrenjtimin e çmimit të ngrohjes”.
Më poshtë reagimi i plotë nga Termokos dhe një sqarim i redaksisë:
Për hir të informimit të drejtë dhe korrekt, NP “Termokos” informon opnionin e gjerë, dhe në veçanti konsumatorët tanë, se në asnjë rast dhe në asnjë rrethanë, nuk është paralajmëruar shtrenjtim i çmimit të ngrohjes, ashtu siç një portal vendor ka publikuar sot një titull tendencioz.
NP “Termokos” SH.A., ka kërkuar nga portali, që ka publikuar këtë titull tendencioz, që ta tërheqë atë dhe të mos dezinformojë opinionin e gjerë me përmbajtje të tilla të pavërteta.
Në të kundërtën, NP “Termokos” do të ndërmarr të gjitha masat e duhura ligjore sa i përket kësaj dezinformate.
Rikujtojmë, se i vetmi autoritet, që rregullon aktivitetin në sektorin e energjisë në Kosovë, dhe si rrjedhojë është përgjegjëse edhe për përcaktimin e tarifave të energjisë termike është Zyra e Rregullatorit për Energji (ZRRE), ndërsa NP “Termokos” vetëm i zbaton ato tarifa.
Ne shprehim keqardhjen tonë të thellë, për çdo shqetësim që mund t’u jetë shkaktuar konsumatorëve tanë me këto lajme të pavërteta.
Sqarim i redaksisë:
Ne nuk kemi thënë asgjë më shumë sesa na është thënë në përgjigje me shkrim nga zëdhënësja për media në Termokos, Afërdita Uka-Zejnullahu. Për hir të korrektësisë, kjo është përgjigja me shkrim që kemi pranuar në email: “Termokos’’ për prodhimin e energjisë termike është i varur kryekëput nga avulli, që marrim nga KEK-u.Sado që, tregu i energjisë në Kosovë, përfshirë këtu edhe çmimin, është i rregulluar nga ZRRE, një krizë eventuale energjetike, në rast se ndikon tek KEK-u, rrjedhimisht do të mund të kishte refleksion edhe tek NP ‘’Termokos’’. Pra ashtu siç thuhet në përgjigjet e Termokos, edhe ne vetëm kemi thënë se “paralajmërohet” shtrenjtim i tarifave të ngrohjes.
