Kryetari i Shoqatës së Naftëtarëve në Kosovë, Fadil Berjani, ka thënë se çmimet e derivateve në Kosovë janë të larta dhe paralajmëron që mund të ketë akoma rritje më të madhe ditëve në vazhdim.
Ai për Buletinin Ekonomik ka thënë se aktualisht çmimi i një litre naftë në vend, po sillet nga 1 euro e 27 centë deri në rreth 1 euro e 35 centë, ndërkohë që çmimi i një litre të benzinës është duke u tregtuar nga 1 euro e 29 centë deri në 1 euro e 36 centë.
Sipas tij, ndër arsyet që kanë ndikuar në rritjen e çmimeve të derivative te ne fillimisht është çmimi i ngritur në berzat ndërkombëtare të karburanteve, por edhe reduktimi I sasive të prodhimit te shumë prodhues të derivateve, të cilët në një farë mënyre përcaktojnë ecurit e çmimeve në tregjet globale të karburanteve.
Mirëpo, edhe gjendja tensionuese në mes të Rusisë dhe Ukranës, që janë prodhues dhe konsumues të mëdhenj të naftës dhe gazit.
Vlerësohet si një nga arsyet e ç’ekulibrimit të ecurive të tregtimit të derivative të naftës dhe çmimeve enorme të këtyre resurseve.
Berjani tutje tha se edhe pse janë çmimet e larta dhe nuk janë të arsyeshme për gjendjen ekonomike të qytetarëve në vend, Kosova prapë se prapë është duke operuar me çmimet më të lira në krahasim me vendet e rajonit.
Bosnja, Serbia dhe Mali i Zi, siç thekson ai, kanë çmimet më të larta të derivateve sesa Kosova, ndërsa në Maqedoninë e Veriut, për shkak të akcizës më të ulët, karburantet tregtohen paksa më lirë se në vendin tonë. Sot në Maqedoninë e Veriut, litra e naftës tregtohet me 1 euro e 21 centë, ndërsa litra e benzinës me 1 euro e 31 centë.
Ndërsa në Shqipëri, aktualisht një litër naftë kushton 1 euro e 56 centë, ndërkohë që çmimi i një litre të bezninës shkon në 1 euro e 58 centë. Ndryshe, kjo rritje e çmimit të derivateve ka filluar që nga muajt e fundit të vitit 2021, me ç’rast nga muaji tetor është vërejtur një rritje graduale e çmimeve të karburanteve në vendin tonë.
Sipas Berjanit, përkundër lëvizshmërisë së ndjeshme të çmimeve, rezervat e derivateve në Kosovë, tani për tani, janë të mjaftueshme. (Blendrita Avdiu)/Buletini Ekonomik/
