Dy miqtë e përjetshëm nga Florida nuk kërkuan kurrë vëmendjen, por më pas ata ndërtuan një perandori shumë milionëshe që shiste artin dixhital dhe njerëzit donin të dinin se kush ishin ata. Nën pseudonimet “Gargamel” dhe “Gordon Goner”, ata krijuan “Bored Ape Yacht Club”, një koleksion prej 10.000 karikaturash majmunësh me modele flokësh dhe veshje të ndryshme.
Ata i shesin këto imazhe si token dixhitale (NFT) dhe tani është e vështirë të marrësh një për më pak se 280,000 dollarë, pjesërisht falë mbështetjeve të personazheve të famshëm nga Paris Hilton te Serena Williams. Gazeta amerikane e lajmeve BuzzFeed bëri disa zbulime në fillim të këtij muaji dhe zbuloi identitetin e tyre të vërtetë – duke shkaktuar një shpërthim zemërimi mes fansave në mediat sociale.
Historia ka ripërqendruar vëmendjen te anonimiteti në botën e kriptomonedhave. Ndërsa krijuesit e “Majmunëve të mërzitur” mund të pëlqejnë të fshihen në botën e kriptove, ata janë pronarë të një biznesi të quajtur Yuga Labs, kështu që duhet të ndjekin të gjitha rregullat e zakonshme të dosjeve të kompanisë, duke përfshirë informacionin e përfituesve të emëruar.
Është e paqartë pse themeluesit e Bored Apes donin të qëndronin anonimë, ata kishin dhënë disa intervista me pseudonimet e tyre. Kritikët thonë se kushdo që fiton para nga NFT-të do të ishte i mençur të kërkonte anonimitetin pasi ajo që po shesin është e pavlerë. Ndonëse fansat kënaqen duke qenë pjesë e një komuniteti ku pronësia e NFT është shpesh një portë për lojëra dhe përfitime të tjera.
Sido që të jetë, kushdo që bën pasuri serioze në këtë fushë ka arsye të dukshme për të qëndruar nën radar. Një krijues që quhet “Owl of Moistness” bashkëthemeloi Yield Guild Games, një startup i fokusuar në video-lojërat NFT në Filipine, ku mania NFT është përhapur në të gjithë popullsinë.
Ai thekson se teknologjia që mbështet kriptovalutat dhe NFT-të në blockchain është një libër ku çdokush mund të gjurmojë transaksionet. Pra, lidhja e identitetit të tij të kriptos dhe botës reale do të lejonte këdo të zbulonte pasurinë e tij. Por sa më i madh bëhet një projekt, aq më i ndërlikuar është të mbetet i panjohur.
Edel Strazimiri / SCAN
