Gjatë mbledhjes së sotme të Qeversë së Kosovës është marrë vendimi për zgjatjen e masave emergjente për furnizimin me energji elektrike edhe për 30 ditë të tjera.
Ky propozim ka ardhur nga Ministria e Ekonomisë, pasi sipas saj, ndonëse gjendja është përmirësuar kohëve të fundit, për shkak të furnizimit të sigurtë me energji, këto masa duhet të vazhdohen edhe për një muaj.
Disa prej masave emergjente për energjinë elektrike të miratuara nga Qeveria dhe Kuvendi i Kosovës në muajin dhjetor 2021, ishin që të ndalohet mihja e kriptovalutave, të bëhet vendosja e kufizimeve në furnizim me energji për konsumatorët dhe vendosja e obligimeve të veçanta për ndërmarrjet e energjisë, përcjell Buletini Ekonomik.
Përmes këtij vendimi, ishte vendosur edhe për themelimin e Komitetit Teknik Emergjent në kuadër të Ministrisë së Ekonomisë – Komitet ky që tashmë përbëhet nga një përfaqësues i Ministrisë së Ekonomisë, një nga ZRRE, një nga KOSTT, një nga KEK-u, një nga KEDS, një nga KESCO, një nga Ministria e Industrisë, Ndërmarrësisë dhe Tregtisë, një përfaqësuese nga MPB-ja, një nga Komisioni për Miniera dhe Minerale dhe një anëtarë nga Autoriteti Kosovar i Konkurrencës, i cili ka për qëllim që të identifikojë dhe paraqesë rekomandime për masat kufizuese për ministren e Ekonomisëm, Artane Rizvanollin.
Masa të tjera kufizuese nga shpallja e gjendjes emeregjente me energji, ishin kufizimet mbi aktivitetet komerciale që kanë të bëjnë me burime të caktuara të energjisë, vendosja e kushteve të veçanta komerciale, kufizimi i tregtimit të energjisë ose vendosja e kushteve të veçanta për tregtim, detyrimi për prodhim të energjisë që do të ndodhë në objekte të saktësuara të prodhimit dhe vendosja e detyrimeve për furnizim me energji për konsumatorë të caktuar vetëm në pajtim me kriteret e parapërcaktuara dhe objektivat e sajuara nga Operatori i Sistemit të Transmetimit dhe Operatori i Sistemit të Shpërndarjes dhe të miriratuara nga Zyra e Rregullatorit të Energjisë./Buletini Ekonomik/
