Kryeministri i Kosovës, Albin Kurti, bashkë me zëvendësministren e Punëve të Jashtme dhe Diasporës, Liza Gashi, ka pritur në takim një delegacion nga Unioni i bizneseve shqiptare-gjermane, të drejtuar nga Nazmi Viqa.
Kryeministri Kurti i falënderoi ata për angazhimin dhe kontributin që kanë dhënë si platformë ekonomike në mërgatë.
Ai me këtë rast foli për mundësitë që Kosova ofron për investime dhe i njoftoi bizneset për themelimin e Gjykatës Komerciale, që siç bëri me dije ai, e njëjta pritet të funksionalizohet brenda dy muajve të ardhshëm.
Kurti tha se funksionalizimi i kësaj gjykate, do të rrisë sigurinë juridike për bizneset vendore dhe investimet e huaja.
Duke u shprehur interesimin për të krijuar një partneritet të ngushtë me mërgatën, Kurti u shpreh se mirëpret gjithë ndërmarrësit nga mërgata që bashkë edhe me partnerët e tyre ndërkombëtarë të investojnë në Kosovë, me prioritet në prodhim të produkteve.
Ndër të tjera, në takim u diskutua edhe për brengat dhe sfidat që kanë bizneset.
