Bordi i Zyrës së Rregullatorit për Energji (ZRRE) në mbledhjen e djeshme, ka miratuar aplikimin e nëntë projekteve solare për vetkonsum.
Këto nëntë projekte për vetkonsum kanë kapacitetin total prej 300.15 kilovat për orë, përcjell Buletini Ekonomik.
Në të njëjtën seancë, Bordi i ZRRE-së ka dërguar raportin vjetor të saj në Kuvendin e Republikës së Kosovës.
“Raporti paraqet një pasqyrë detale të aktiviteteve të zhvilluara dhe arritjeve kryesore të ZRRE-së dhe të sektorit të energjisë në vitin 2021”, thuhet në komunikatën e ZRRE-së.
Më shumë:
E konfirmon ZRrE-ja: Tarifat e reja llogariten nga 9 shkurti
Bordi, në këtë mbledhje ka shqyrtuar edhe raportin e Vlerësimit të Konkurrencës, me ç ‘rast ka marrë vendim për Vendosjen e Detyrimit të Shërbimit Publik për Furnizuesin KESCO.
Përveç këtyre, anëtarët e këtij Bordi kanë aprovuar edhe kërkesën e ‘MCM COMMODITIES SH.P.K’ për licencim të aktivitetit të furnizimit me energji elektrike në afat prej 5 vitesh.
“Janë shqyrtuar po ashtu edhe disa ankesa të konsumatorëve si dhe çështje të tjera që kanë të bëjnë me menaxhimin e Zyrës së Rregullatorit për Energji”, thuhet tutje në komunikatë. /Buletini Ekonomik/
