53 projekte të energjisë së ripërtëritshme në Kosovë, me kapacitet të përgjithshëm prej 670 megavatësh, po presin miratimin.
Kështu thuhet në raportin e Institutit të Prishtinës për Studime Politike (PIPS) për zbatimin e agjendës së gjelbër në Kosovë, të përkrahur nga Qeveria Federale Gjermane, GIZ dhe Bashkimi Evropian. Të dhënat janë të bazuara në regjistrin e ZRRE-së për autorizim.
Nga këto projekte, 283.5 megavat janë projekte të hidroenergjisë (nga të cilat 250 megavat janë të ndara për një projekt të ruajtjes së energjisë – reverzibil), 102.3 megavat të energjisë solare, 279 të energjisë së erës dhe 5.2 megavat me biomasë, raporton Kosovo.Energy.
| Burimi | Kapaciteti | Numri i projekteve |
| Hidroenergji (dhe projekti reverzibil 250 megavatësh) | 283.45 | 7 |
| Energjia solare | 102.3 | 36 |
| Energjia e erës | 279 | 9 |
| Biomasa | 5.2 | 1 |
| Total: | 669.95 | 53 |
Pjesa më e madhe e energjisë elektrike të prodhuar në Kosovë prodhohet nga djegia e thëngjillit.
Dy termocentralet (Kosova A dhe B), të ndërtuara ndërmjet viteve 1962 dhe 1984, ende prodhojnë rreth 95% të energjisë elektrike, raporton Kosovo.Energy.
Duke shtuar mungesën e zbatimit të masave për efiçiencën e energjisë, Kosova ende nuk ka zhvilluar kapacitete të reja të BRE dhe ngrohje qendrore.
Për momentin, Kosova ka 278 megavat kapacitete të energjisë së ripërtëritshme të instaluar.
