Çmimet e naftës shënuan rënie, pasi prodhuesit globalë ka të ngjarë të mbajnë të pandryshuar nivelin e prodhimit në pritje të takimeve gjatë javës të OPEC+ dhe Rezervës Federale. Për këtë arsye investitorët po tregohen të kujdesshëm duke shmangur cdo situatë që do të nxiste paqëndrueshmërinë e tregut.
Kontratat e së ardhmes së naftës së papërpunuar Brent ranë 74 cent, në 85.92 dollarë për fuçi, ndërsa nafta e papërpunuar e Teksasit Perëndimor u tregtua në 79.07 dollarë për fuçi, duke rënë 61 cent.
Përpara takimit të politikave të Rezervës Federale të planifikuar në 31 janar deri më 1shkurt, tregu përgjithësisht pret që banka qendrore e SHBA të rrisë normat e interesit me të paktën 25 pikë bazë, duke rritur shqetësimet se rritja e zgjatur e kostove të huamarrjes nga Fed do të mbysë rritjen e kërkesës për karburant të konsumatorit më të madh të naftës në botë.
Ekspertët këmbëngulin se çmimet e naftës ka të ngjarë të rëndohen nga rritjet e mundshme të normave të interesit në takimin e ardhshëm të Fed.
Ministrat nga Organizata e Vendeve Eksportuese të Naftës – OPEC – dhe aleatët, përfshirë Rusinë, të njohur kolektivisht si OPEC+, nuk ka gjasa të ndryshojnë politikën e tyre aktuale të prodhimit të naftës kur të takohen më 1 shkurt.
Analistët e Bankës Kombëtare të Australisë u shprehën të bindur se asnjë ndryshim në prodhimin e OPEC + nuk pritet të shpallet në takimin e kësaj jave dhe pritet që komenti i perspektivës nga Fed i SHBA të jetë shtytësi kryesor i perspektivës në një afat të shkurtër.
Çmimet e naftës u rritën më herët të hënën mes tensioneve në Lindjen e Mesme pas një sulmi me dron në vendin prodhues të naftës, Iran.
Kina, importuesi më i madh në botë i naftës së papërpunuar, u zotua gjatë fundjavës të promovojë një rikuperim të konsumit që do të mbështeste kërkesën për karburant pasi i dha fund kufizimeve strikte të COVID-19 në dhjetor.
Vendi rifillon punën këtë javë pas festave të Vitit të Ri Hënor. Numri i pasagjerëve që udhëtonin para pushimeve u rrit mbi nivelet në dy vitet e fundit, por është ende nën vitin 2019. /Scan tv/
