Si pjesë e projektit AlpinSolar, 5000 panele diellore u instaluan me sukses në digën e vendosur në liqenin Muttsee të Zvicrës.
Diga ndodhet në 2500 metra mbi nivelin e detit, që do të thotë se është më e larta në Evropë. Prodhimi i energjisë tashmë ka filluar.
Me projekte si AlpinSolar, i cili u krijua përmes investimit të tre kompanive, Zvicra filloi tranzicionin e saj të madh nga energjia bërthamore në energjinë e gjelbër, siç ishte planifikuar në vitin 2011. Zvicra ka prodhuar më parë një “bateri uji” masive për të ruajtur energjinë e saj të rinovueshme.
Diga ndodhet në kantonin zviceran të Glarus dhe është e rrethuar nga maja të mbuluara me borë. Qëllimi i projektit është të prodhojë 3.3 milion kilovat energji në vit për të furnizuar 700 familje. Në muret e digës janë vendosur 5000 panele diellore dhe diga është edhe “shtëpia” e një hidrocentrali. Gjerësia e instalimit të panelit diellor është një kilometër dhe është projektuar për të gjeneruar 2.2 megavat energji elektrike.
Kompania energjetike Axpo, e cila mori pjesë në projektin e përbashkët, përdori module diellore xhami me dy shtresa të prodhuara nga kompania zvicerane Megasol. Ato kanë kthesa prej 40 mm dhe mund të përballojnë ngarkesën e borës që bie në Alpet zvicerane.
Edhe pse vendosja e paneleve diellore në malet e mbuluara me borë mund të duket kundërintuitive, Axpo pret që ata të performojnë më mirë në këto rajone, veçanërisht në dimër. Arsyeja është se ndryshe nga lartësitë më të ulëta ku dominon mjegulla në muajt e dimrit, dielli shkëlqen në lartësi më të larta në Zvicër.
Një avantazh shtesë është bora e bardhë që reflekton rrezet e diellit në panelet diellore, e cila gjithashtu krijon rendiment më të lartë kur funksionon në temperatura më të ulëta. Në këtë mënyrë pritet të prodhohet tre herë më shumë energji në muajt e dimrit si në shkurt dhe mars krahasuar me pjesën tjetër të vitit.
Në vitet e ardhshme është planifikuar ndërtimi i 4200 projekteve diellore në rajonet e ulëta dhe malore të Zvicrës. Vitin e kaluar, qeveria e vendit amendoi Aktin e saj të Energjisë për të lejuar miratime më të shpejta për termocentralet e reja diellore në vend, raporton Reuters.
