Tregtia botërore e mallrave parashikohet të ngadalësohet gjatë vitit 2023, në masën 1.7 për qind nga një rritje prej 2.7 për qind që ishte vitin e kaluar.
Sipas raportit “Perspektiva dhe Statistikat e Tregtisë Botërore”, publikuar nga Organizata Botërore e Tregtisë (OBT), lufta Rusi-Ukrainë, inflacioni i vazhdueshëm, politika më e shtrënguar monetare dhe pasiguria e tregut financiar parashikohen të frenojnë rritjen e tregtisë botërore të mallrave.
OBT rishikoi projeksionin e saj me rritje krahasuar me vlerësimin e mëparshëm prej 1 për qind tetorin e kaluar, falë heqjes së kufizimeve të COVID-19 nga Kina, e cila pritet të çlirojë kërkesën e ndrydhur të konsumatorëve në vend, duke nxitur nga ana tjetër tregtinë ndërkombëtare.
Rritja e tregtisë në vitin 2022 ishte nën pritshmëritë prej 3.5 për qind për shkak të rritjes së çmimeve botërore të mallrave, shtrëngimit të politikës monetare për të zbutur inflacionin dhe ndërprerjeve të zinxhirëve të furnizimit të ndikuara nga masat anti-COVID-19 në Kinë.
Në vitin 2024, rritja e tregtisë botërore vlerësohet të përshpejtohet në masën 3.2 për qind ndërsa Prodhimi i Brendshëm Bruto të rritet në masën 2.6 për qind. /Telegrafi/
