Ligji i ri për Administratën Tatimore dhe Procedurat ka vënë në vështirësi shumë biznese në Kosovë, pas ndryshimeve të bëra sa i përket kryerjes së pagesave. Një ndër ndryshimet më të diskutueshme është obligimi për kryerjen e transaksioneve përmes bankës për shumën mbi 300 euro.
Sipas ligjit të ri, çdo transaksion mbi 300 euro duhet të kryhet vetëm përmes bankës.
Sipas njohësit të ekonomisë, Safet Gërxhaliu, ky ndryshim po krijon një barrë të rëndë financiare për kompanitë e vogla dhe të mesme, të cilat shpeshherë varen nga pagesat në dorë për të mbajtur aktivitetet e tyre të përditshme.
“Me hyrjen në fuqi të këtij ligji, shumë NVM kanë hasur në vështirësi për të mbledhur pagesat e shitjeve në kohë. Në të kaluarën, pagesat bëheshin në dorë në kohën reale të furnizimit të produkteve, ndërsa tani, çdo transaksion mbi 300 € duhet të kryhet përmes bankës. Ky ndryshim ka çuar në vonesa të shumta në ekzekutimin e pagesave nga klientët, duke zhytur shumë kompani në borxhe dhe duke krijuar një cikël negativ financiar”, ka thënë Gerxhaliu, pas komunikimeve që ka pasur me shumë biznese.
Ligji i ri gjithashtu përmban zgjatjen e afatit të vlerësimit tatimor retroaktiv nga 6 në 10 vite dhe zgjatjen e afatit të ruajtjes së librave nga 6 në 10 vite. Sipas Gërxhaliut, këto ndryshime përfaqësojnë një barrë të shtuar për bizneset, sidomos për NVM-të, të cilat sipas tij, tashmë përballen me 101 barriera në ushtrimin e veprimtarive të tyre.
“Kjo rritje e byrokracisë dhe përgjegjësive administrative vetëm sa i komplikon më tej funksionimin e tyre”, ka shtuar Gërxhaliu. /Buletini Ekonomik/
