Qeveria e Kosovës pritet të prezantojë sot vendimin për vendosjen e masave anti-dumping ndaj Serbisë, një nga dy vendimet e rëndësishme që do të bëhen publike sot në një konferencë për media të paralajmëruar nga ministrja në detyrë e Ekonomisë, Mimoza Kusari.
Sipas njoftimit, në konferencë do të prezantohen vendimi për vendosjen e masave anti-dumping për Serbinë, si dhe vendimi për kufizimin sasior të importeve.
Konferenca do të mbahet sot, më 5 qershor 2026, në ora 12:00, në ambientet e Ministrisë së Industrisë, Ndërmarrësisë dhe Tregtisë (MINT).
Masat anti-dumping janë instrumente mbrojtëse tregtare që përdoren për të parandaluar importimin e produkteve me çmime nën vlerën e tyre reale të tregut, me qëllim mbrojtjen e prodhuesve vendorë nga konkurrenca e padrejtë.
Detaje të tjera lidhur me përmbajtjen e vendimeve dhe efektet e tyre në tregun kosovar pritet të bëhen të ditura gjatë konferencës.
Buletini do t’ju mbajë të informuar me zhvillimet dhe detajet e plota nga konferenca. /Buletini Ekonomik/
