Trusti shënon rekord, 312 milionë euro kthim bruto nga investimet për gjashtë muaj

Fondi i Kursimeve Pensionale të Kosovës (Trusti) ka regjistruar nivelin më të lartë të kthimit bruto nga investimet për një periudhë gjashtëmujore, duke arritur rreth 312 milionë euro gjatë periudhës 1 janar – 30 qershor 2026.

Sipas të dhënave të publikuara nga Trusti, ky është rekordi i kthimit bruto nga investimet në një gjysmë viti që nga themelimi i fondit.

Po ashtu, të dhënat tregojnë se kthimet bruto nga investimet kanë shënuar rritje të vazhdueshme gjatë viteve të fundit. Në vitin 2023 ato arritën në 88 milionë euro, në vitin 2024 u rritën në 247 milionë euro, ndërsa gjatë vitit 2025 kapën vlerën e 309 milionë eurove.

Kur llogaritet edhe kthimi bruto prej rreth 312 milionë eurosh në gjashtëmujorin e parë të vitit 2026, rezulton se Trusti ka akumuluar gjithsej rreth 956 milionë euro kthim bruto nga investimet për periudhën 1 janar 2023 deri më 30 qershor 2026.

Sipas Trustit, ky rezultat pasqyron performancën pozitive të investimeve të fondit gjatë kësaj periudhe dhe shënon një tjetër rekord në menaxhimin e kursimeve pensionale të qytetarëve të Kosovës. /Buletini Ekonomik/