Aparati, i cili bën diagnostikimin e hershëm të leukemisë tek fëmijët ka gjashtë vjet që rri kot në Klinikën e Pediatrisë të Qendrës Klinike Universitare të Kosovës. Ky institucion ka dështuar që për kaq vite të përgatisë stafin për përdorim, dhe për pasojë asnjë pacientit nuk i janë bërë analizat me të. Analizat e ngjashme që kryhen në Maqedoni dhe Shqipëri kushtojnë ndërmjet 600 e 700 euro.
QKUK-ja është institucioni i vetëm shëndetësor në Kosovë, i cili e posedon aparaturën për “Flow Citometry”, donacion i organizatës joqeveritare “Ndihmë Fëmijëve me Kancer” (NFK). Drejtuesi i kësaj organizate, Ilir Gorani, ka deklaruar se QKUK-ja nuk ka pasur buxhet të mjaftueshëm për t’i dërguar mjekët për specializim në Austri.
“QKUK-ja s’ka qenë e gatshme për ta funksionalizuar këtë aparaturë. Reagensët janë siguruar nga organizata “ Care for Kosovo Kids” si donacion. Aparatura nuk është amortizuar, sepse shoqata jonë vazhdimisht ka paguar teknikë specialistë për ta mirëmbajtur”, ka deklaruar Gorani.
Sipas tij, janë katër mjekë specializantë të QKUK-së që kanë kryer trajnimin në Austri dhe se deri në fund të muajit tetor, “Flow Citometry” do të vihet në funksion. /Koha.net/
