Oda e Afarizmit të Kosovës ka kërkuar që të krijohen lehtësira tregtare për lëvizje të biznesmenëve në këtë kohë krize, për bizneset nga Kosova dhe Shqipëria.
Sipas OAK-ut, kjo është më se e domosdoshme në mënyrë që qytetarët të furnizohen sa më mirë me të gjitha produktet e nevojshme, sidomos tani kur është periudha e produkteve sezonale bujqësore, ku në Shqipëri ka tepricë të këtyre produkteve ndërsa në Kosovë ka kërkesë për këto produkte dhe anasjelltas.
“Përmes lejimit të qarkullimit, biznesmenët do të kenë mundësi që të rritin blerjen e produkteve të disponueshme në këtë kohë. OAK kërkon që të ndërmerren masat e nevojshme dhe bizneseve tregtare të iu krijohen lehtësira për qarkullim në mënyrë që të bëjnë furnizimin e duhur me produktet e nevojshme nga njëri vend në tjetrin” thuhet në kërkesë.
Kjo letër është bërë më kërkesë të bizneseve tregtare, për arsye të pengesave të qarkullimit që janë krijuar si rezultat i pandemisë.
Kërkesa nga Oda e Afarizmit të Kosovës u është dërguar Kryeministrit të Shqipërisë, Edi Rama dhe Kryeministrit në detyrë të Kosovës, Albin Kurti, si dhe ministrave përkatës të Shqipërisë dhe Kosovës.
