Sipas anketës së fuqisë punëtore, e cila ishte publikuar nga Agjencia e Statistikave të Kosovës, dy të tretat e popullësisë në vend gjatë vitit 2018 kanë qenë të papunë. Një papunësi e lartë është vlerësuar të jetë edhe gjatë këtij viti e kjo edhe si rrjedhojë e moskualifikimit të qytetarëve për shumë punë, shkruan Gazeta “Zëri”.
Edhe pse shumë të rinj janë të kualifikuar për punë të ndryshme, atyre u ofrohet një mundësi që përmes aftësimit profesional të përgatiten për disa profesione.
Bedri Xhafa, udhëheqës i përgjithshëm në Agjencinë e Përkrahjes së Punësimit në Kosovë (APPK), ka thënë për “Zërin” se njëra prej formave me të cilat kjo agjenci u ofron përkrahje punëkërkuesve në punësimin e tyre është aftësimi profesional.
Sipas tij, profesionet që kanë të bëjnë me mjeshtri të ndryshme në ndërtimtari janë profesionet më të kërkuara, por që edhe profesionet specifike në bujqësi, sidomos në fushë e përpunimit të produkteve, fusha e IT-së, por edhe njohja e gjuhës gjermane kanë filluar të jenë mjaft të kërkuara në Kosovë.
Xhafa ka bërë të ditur se si organizatë përmes projekteve të ndryshme u ofrojnë aftësime profesionale punëkërkueseve.
“Në projektin SWEI, i financuar nga Komisioni Evropian, 20 punëkërkues nga regjioni i Prizrenit janë duke u trajnuar në trajnimin ‘Punëtorë për mbledhje, kultivim dhe përpunim të frutave të malit’. 20 punëkërkues nga regjioni i Prizrenit janë duke u trajnuar në trajnimin ‘Punëtorë për mbledhje, kultivim dhe përpunim të bimëve mjekësore dhe aromatike’. 20 punëkërkues nga regjioni i Prizrenit janë duke u trajnuar në trajnimin ‘Si ta themeloj dhe ta zhvilloj afarizmin privat?’”, ka thënë ai për “Zërin”.
Sipas tij, si Agjenci kanë bashkëpunim edhe me institucione në Gjermani.
