Përkundër reshjeve të borës që kanë filluar nga dita e djeshme, Ministria e Infrastrukturës deklaron se të gjitha rrugët janë të kalueshme.
Lajmin për Telegrafin e ka bërë të ditur shefi i Departamentit të Mirëmbajtjes së Rrugëve në MI, Gëzim Osmani duke shtuar se kompanitë kanë intervenuar gjatë gjithë kohës.
“Të gjitha rrugët janë të kalueshme. Kompanitë kanë intervenuar gjatë gjithë kohës ne pastrim të rrugëve për përmasimin e gjendjes së rrugëve”, tha Osmani.
Ndryshe, Instituti Hidrometeorologjik i Kosovës bën të ditur se java e dytë e muajit shkurt do të karakterizohet me mot relativisht të qëndrueshëm, përjashtuar dy ditët e para të javës, ku parashihen reshje shiu dhe bore.
IHK njofton se nga e mërkura temperaturat do të kenë ngritje e lehtë në të dy vlerat.
Minimalet parashihen të ulen deri -3 gradë, kurse maksimalet parashihen të arrijnë deri 11 gradë Celsius.
Do të fryjë erë kryesisht nga veriperëndimi me shpejtësi 1-9 m/s.
