Agresioni ushtarak rus në Ukrainë ka bërë që Organizata Botërore e Tregtisë (OBT) të ulë parashikimin e saj të rritjes së tregtisë botërore për këtë vit.
Parashikimi i mëparshëm i rritjes prej 4.7 për qind është ulur në 2.5 për qind për shkak të “ndikimit të luftës dhe të politikave që lidhen me të”.
Ky reduktim lidhet gjithashtu edhe me problemet e vazhdueshme në zinxhirët e furnizimit botëror, të cilat filluan si rezultat i pandemisë COVID-19.
Rusia dhe Ukraina përbëjnë vetëm 2.5 për qind të eksporteve botërore të mallrave, ato “janë shumë, shumë të rëndësishme për disa sektorë të caktuar”.
“Shqetësimi i parë, natyrisht, është për njerëzit e Ukrainës, të cilët po zhvendosen dhe nuk kanë ushqim të mjaftueshëm për të ngrënë”, tha shefja e OBT-së, Ngozi Okonjo-Iweala.
Furnizimet e shumë produkteve ushqimore, duke përfshirë grurin dhe misrin, janë ndikuar pas pushtimit të Ukrainës nga Rusia.
Grupet e industrisë kanë paralajmëruar se Bashkimi Evropian do të përballet me mungesa të vajit të lulediellit. Sipas S&P Global, 46.9 për qind e eksporteve botërore të vajit të lulediellit vijnë nga Ukraina dhe 29.9 për qind nga Rusia, por për shkak të mbylljes së porteve të Ukrainës, eksportet kanë rënë ndjeshëm.
Edhe para agresionit rus në Ukrainë, pandemia kishte shkaktuar një mospërputhje midis ofertës dhe kërkesës në shumë industri, gjë që rriti shumë çmimet.
