Në Kosovë gjatë muajit prill të këtij viti kanë kërkuar punë afro 30 mijë qytetarë, shumica nga ta meshkuj.
“…punëkërkues të regjistruar sipas grup-moshës ishin 29 mijë e 582 persona, prej tyre 16 mijë e 029 meshkuj dhe 13 mijë e 553 femra”, ka treguar Agjencia e Statistikave.
Kurse sipas këtyre statistikave në Kosovë të punësuar figurojnë mbi 360 mijë qytetarë të punësuar.
“Në muajin prill, të punësuar me pagë primare janë regjistruar 360 mijë e 446 persona, derisa të punësuar me pagë sekondare janë regjistruar 16 mijë e 966 persona”.
Punësimi sipas aktiviteteve dhe gjinisë mbi moshën 15 vjeçare ishte më i madh tek Administrata publike dhe mbrojtja, sigurimi i detyrueshëm social (22.8%); Tregtia me shumicë dhe pakicë, riparime automjetesh dhe motoçikletash (21.7%); Prodhimi (11.1%); Ndërtimtaria (6.2%); Aktivitetet e akomodimit dhe shërbimet e ushqimit (5.4); Aktivitetet financiare dhe të sigurimeve (5.4%), etj.
Agjencia e Statistikave ka treguar se këto të dhëna bazohen në të dhënat e Administratës Tatimore të Kosovës (ATK) dhe Agjencisë së Punësimit të Republikës së Kosovës (APRK).
