Autoriteti i Konkurrencës ka reaguar lidhur me paralajmërimet për ngritjen e çmimeve të bukës, kafesë dhe produkteve të shportës bazike.
Përmes një deklarate zyrtare, AK-ja thotë se nuk ka mandat për të përcaktuar ose ulur çmimet, por ndërhyn kur çmimet përcaktohen në mënyrë të bashkërenduar ose artificiale, nga ndërmarrje konkurrente.
“Fushëveprimi i autoritetit përfshin parandalimin dhe ndalimin e marrëveshjeve të ndaluara ndërmjet ndërmarrjeve, keqpërdorimit të pozitës dominuese, si dhe kontrollin e përqendrimeve ekonomike, në rastet kur ato cenojnë konkurrencën në treg”, thuhet në njoftim.
Autoriteti thotë se, për shkak të shqetësimeve të ngritura nga qytetarët dhe raportimeve të shumta në media, janë intensifikuar aktivitetet e tij për monitorimin e tregut.
“Aktualisht, është duke u zhvilluar një analizë e thelluar e mbi 20 produkteve bazë për të analizuar arsyet e ngritjeve të çmimeve në tregun e Kosovës.
Gjithashtu, ka filluar monitorimi i tregut të bukës, dhe autoriteti është në proces të mbledhjes së informatave për të vlerësuar nëse rritjet e fundit të çmimeve në këtë sektor janë të arsyetuara apo në kundërshtim me Ligjin për konkurrencën”, thuhet në njoftim.
Nga autoriteti deklarojnë se sektori i gastronomisë, me theks të veçantë në rritjen e çmimit të kafesë, është nën vëzhgim.
“Inspektorët e autoritetit janë duke zhvilluar vizita në terren në qytete të ndryshme të Kosovës, duke mbledhur të dhëna dhe informata direkte nga operatorët e tregut.
Pas përfundimit të fazës së analizës dhe grumbullimit të informatave, nëse identifikohen shkelje të Ligjit për mbrojtjen e konkurrencës, autoriteti do të ndërmarrë veprimet e nevojshme ligjore, në përputhje me kompetencat e tij”, thuhet në njoftim.
Autoriteti i Konkurrencës deklaron se mund të ndërmarrë masa të përkohshme, përmes të cilave fillon procedurën dhe merr vendim për vendosjen e këtyre masave ndaj ndërmarrjeve, kur ekziston rreziku i dëmtimit të pariparueshëm të konkurrencës në treg, veçanërisht kur veprimet e caktuara e çrregullojnë tregun.
