Agjencia e Statistikave të Kosovës (ASK) ka publikuar të dhënat për sektorin e energjisë për muajin shkurt 2026, duke evidentuar rënie të konsumit të energjisë elektrike, përkundër rritjes në prodhim nga burimet e ripërtëritshme dhe import.
Sipas statistikave, prodhimi bruto i energjisë nga hidrocentralet arriti në 29.688 GWh, duke shënuar një rritje të ndjeshme prej 123,43% krahasuar me shkurtin e vitit 2025. Rritje është regjistruar edhe në prodhimin nga era dhe dielli, duke reflektuar një zgjerim të përdorimit të burimeve të gjelbra.
Energjia elektrike bruto në dispozicion ishte 709.14 GWh, që paraqet një rënie prej 8,69% në baza vjetore. Ndërkohë, konsumi i përgjithshëm ka rënë për 3,75%, duke arritur në 516.19 GWh.
Sa i përket strukturës së konsumit, amvisëritë dominojnë me 61,7% të totalit, pasuar nga sektori komercial me 24,3%, industria me 10,4% dhe sektorët e tjerë me pjesëmarrje më të vogël.
Të dhënat tregojnë gjithashtu ndryshime në rrjedhat e importit dhe eksportit të energjisë elektrike, duke reflektuar luhatjet në furnizim dhe kërkesë. Sipas ASK-së, këto zhvillime pasqyrojnë dinamikat e tregut energjetik në vend gjatë muajit shkurt 2026. /Buletini Ekonomik/
